రాజీవ్‌ గాంధీతో పెళ్లి తర్వాత తొలిసారి తందూరీ చికెన్‌ రుచి చూశా: సోనియా గాంధీ

రాజీవ్‌ గాంధీతో వివాహం తర్వాత భారతీయ సంప్రదాయాలు, గాంధీ కుటుంబంలోని ఆహారపు అలవాట్లకు సంబంధించిన ఆసక్తికర జ్ఞాపకాలను కాంగ్రెస్‌ పార్లమెంటరీ పార్టీ ఛైర్‌పర్సన్‌ సోనియా గాంధీ పంచుకున్నారు. నవంబర్‌ 10న విడుదల కానున్న తన ఆత్మకథ ‘బిలాంగింగ్‌: ఎ జర్నీ ఆఫ్‌ లవ్‌’లో ఈ విషయాలను వెల్లడించారు. రాజీవ్‌ గాంధీతో కలిసి తొలిసారి తందూరీ చికెన్‌ రుచి చూసినట్లు ఆమె గుర్తుచేసుకున్నారు. ఎర్రగా, కొద్దిగా మాడిపోయిన ఆ వంటకాన్ని తినగానే నోట్లో మంట పుట్టిందని, ఆ తర్వాత క్రమంగా కుటుంబ సభ్యులతో కలిసి భోజనం చేయడం అలవాటైందని తెలిపారు. ఈ పుస్తకంలోని కొన్ని పేజీలను ప్రచురణ సంస్థ సోషల్‌ మీడియాలో పంచుకుంది.

గాంధీ కుటుంబంలో సాధారణంగా అన్నం, పుల్కాలు, కూరతో పాటు మటన్‌, చేపలు లేదా చికెన్‌ వడ్డించేవారని, కందిపప్పు మాత్రం ప్రతిరోజూ ఉండేదని సోనియా గాంధీ వివరించారు. చీరను ప్రపంచంలోని అత్యంత అందమైన వస్త్రాల్లో ఒకటిగా భావించేదాన్నని, స్వయంగా ధరించడం నేర్చుకున్నానని పేర్కొన్నారు. నిశ్చితార్థం కోసం ముదురు ఆకుపచ్చ, లేత పసుపు రంగుల చీరను ఎంచుకుని, దాన్ని అనేక సేఫ్టీ పిన్నులతో ధరించినట్లు గుర్తుచేసుకున్నారు. వివాహ సమయంలో మాత్రం జవహర్‌లాల్‌ నెహ్రూ జైలులో ఉన్నప్పుడు నేసిన నూలుతో తయారైన చీరను ధరించినట్లు తన ఆత్మకథలో వెల్లడించారు.