కేజీఎఫ్‌-2 వీడియోతో కర్ణాటక బీజేపీ పోస్ట్‌.. తీవ్ర విమర్శలు

స్వాతంత్ర్య దినోత్సవం సందర్భంగా ఎర్రకోట నుంచి ప్రధాని నరేంద్ర మోదీ చేసిన ప్రసంగంలో ‘దిమాగీ నక్సల్స్‌’ అనే పదప్రయోగంపై రాజకీయ దుమారం కొనసాగుతోంది. మావోయిస్టు భావజాలానికి మద్దతు ఇచ్చేవారిని ఉద్దేశించి ప్రధాని ఈ పదాన్ని ఉపయోగించారని ప్రతిపక్షాలు విమర్శించాయి. తాజాగా కర్ణాటక బీజేపీ అధికారిక ఎక్స్‌ ఖాతాలో ‘దిమాగీ నక్సల్స్‌’పై పోరాటం చేస్తామంటూ పెట్టిన పోస్టుకు ‘కేజీఎఫ్‌ చాప్టర్‌-2’లోని కాల్పుల సన్నివేశాన్ని జత చేయడం వివాదానికి దారితీసింది. ఈ వీడియోలో హీరో యశ్‌ పాత్ర ప్రత్యర్థులపై కాల్పులు జరిపే సన్నివేశం ఉంది.

ఈ పోస్టుకు ముందు ఛత్తీస్‌గఢ్‌ బీజేపీ కూడా ‘దిమాగీ నక్సల్స్‌’ అంశంపై ‘మీర్జాపూర్‌’ వెబ్‌సిరీస్‌కు సంబంధించిన వీడియో క్లిప్‌ను ఉపయోగించింది. దీనికి ప్రతిస్పందనగానే కర్ణాటక బీజేపీ ‘కేజీఎఫ్‌-2’ క్లిప్‌ను పోస్ట్ చేసినట్లు తెలుస్తోంది. అధికార పార్టీ అధికారిక ఖాతాల్లో ఇలాంటి వీడియోలను ఉపయోగించడం ప్రజాస్వామిక వర్గాల నుంచి విమర్శలకు దారితీసింది. తమను ప్రశ్నించే వారిని బెదిరించేలా బలప్రయోగాన్ని సూచించే సందేశాలు ఇవ్వడం సరికాదని విమర్శకులు అభిప్రాయపడుతున్నారు.