కోర్టు విచారణ వీడియోల అక్రమ అప్‌లోడింగ్‌పై చర్యలు తీసుకోండి.. MeitYకి సుప్రీంకోర్టు ఆదేశం

కోర్టు విచారణలకు సంబంధించిన వీడియోలు, రికార్డింగ్‌లను అనుమతి లేకుండా సోషల్ మీడియాలో అప్‌లోడ్ చేయడం, ఇతరులకు షేర్ చేయడం, వాటి ద్వారా వాణిజ్య ప్రయోజనాలు పొందడాన్ని అరికట్టేందుకు చర్యలు తీసుకోవాలని సుప్రీంకోర్టు కేంద్ర ప్రభుత్వాన్ని కోరింది. ఈ మేరకు ఎలక్ట్రానిక్స్ అండ్ ఇన్ఫర్మేషన్ టెక్నాలజీ మంత్రిత్వ శాఖ (MeitY) రూపొందిస్తున్న ప్రతిపాదిత విధానంలో తగిన నిబంధనలను చేర్చాలని సూచించింది. న్యాయస్థానాల విచారణలకు సంబంధించిన వీడియోల దుర్వినియోగాన్ని అరికట్టడమే ఈ చర్యల ప్రధాన ఉద్దేశమని పేర్కొంది.

భారత ప్రధాన న్యాయమూర్తి జస్టిస్ సూర్యకాంత్ నేతృత్వంలోని ముగ్గురు సభ్యుల ధర్మాసనంలో జస్టిస్ జోయ్‌మాల్య బాగ్చీ, జస్టిస్ వి. మోహన కూడా ఉన్నారు. గతంలో ఇచ్చిన ఆదేశాలను తప్పనిసరిగా అమలు చేయాలని ధర్మాసనం స్పష్టం చేసింది. న్యాయ విచారణలకు సంబంధించిన వీడియో క్లిప్‌లను సేకరించడం, ఉపయోగించడం లేదా ప్రచారం చేయడం కోసం సంబంధిత అధికారుల ముందస్తు అనుమతి తప్పనిసరని మరోసారి గుర్తుచేసింది. నిబంధనలను ఉల్లంఘించే వారిపై చర్యలు తీసుకునేలా ప్రతిపాదిత విధానంలో ప్రత్యేక వ్యవస్థలను ఏర్పాటు చేయాలని సూచించింది.