సూర్య ‘సీన్‌’తో తమిళనాడులో మళ్లీ తెల్లవారుజాము షోలకు ఛాన్స్

తమిళనాడులో గత కొంతకాలంగా థియేటర్లలో ఉదయం 9 గంటల నుంచే సినిమా ప్రదర్శనలు కొనసాగుతున్నాయి. అంతకుముందు తెల్లవారుజామునే ప్రత్యేక షోలు నిర్వహించే సంప్రదాయం ఉండేది. అయితే ‘తునివు’, ‘వారిసు’ సినిమాల విడుదల సమయంలో జరిగిన అభిమానుల సందడి విషాదానికి దారితీసి, ఓ అభిమాని ప్రాణాలు కోల్పోవడంతో భద్రతా కారణాల దృష్ట్యా ప్రభుత్వం ఉదయం 9 గంటల కంటే ముందుగా షోలు ప్రదర్శించడాన్ని రద్దు చేసింది. అప్పటి నుంచి ఈ నిబంధన కొనసాగుతోంది. అయితే తాజాగా కోలీవుడ్ వర్గాల్లో వినిపిస్తున్న సమాచారం ప్రకారం, సూర్య నటిస్తున్న ‘సీన్’ సినిమాతో తమిళనాడులో మళ్లీ తెల్లవారుజామున షోల సంప్రదాయం ప్రారంభమయ్యే అవకాశం ఉందని ప్రచారం జరుగుతోంది. ఇదే నిజమైతే, పెద్ద హీరోల సినిమాల విడుదల సమయంలో కనిపించే పాత సందడి మరోసారి థియేటర్లలో కనిపించనుంది.

ఈ సినిమాలో నజ్రియా ఫహద్ కథానాయికగా నటిస్తుండగా, నస్లెన్ ప్రతినాయకుడి పాత్రలో కనిపించనున్నారు. సూర్య, జీతు మాధవన్, ఝగరం స్టూడియోస్ సంయుక్తంగా ఈ భారీ చిత్రాన్ని నిర్మిస్తున్నారు. సంగీతాన్ని సుషిన్ శ్యామ్ అందిస్తున్నారు. నవంబర్ 6న ‘సీన్’ ప్రేక్షకుల ముందుకు రానుంది. అయితే తెల్లవారుజామున షోల నిర్వహణకు సంబంధించి ఇప్పటివరకు అధికారిక ప్రకటన వెలువడలేదు. ఒకవేళ అనుమతి లభిస్తే, సినిమాకు తొలి రోజు వసూళ్ల పరంగా ప్రయోజనం కలగడమే కాకుండా, తమిళ సినిమా అభిమానుల్లోనూ కొత్త ఉత్సాహం నెలకొనే అవకాశం ఉంది.