మహేష్‌గౌడ్‌, అద్దంకి దయాకర్‌పై హరీశ్‌రావు పరువునష్టం కేసు

తనపై ‘క్షుద్ర పూజలు’ చేశారంటూ చేసిన వ్యాఖ్యలపై బీఆర్‌ఎస్‌ ఎమ్మెల్యే హరీశ్‌రావు న్యాయపోరాటానికి దిగారు. టీపీసీసీ అధ్యక్షుడు మహేష్‌కుమార్‌ గౌడ్‌, కాంగ్రెస్‌ నేత అద్దంకి దయాకర్‌పై ఎమ్మెల్యే/ఎంపీ కోర్టులో పరువునష్టం కేసు దాఖలు చేశారు. ఈ వ్యాఖ్యలపై ఇద్దరికీ ఇప్పటికే హరీశ్‌రావు లీగల్‌ నోటీసులు జారీ చేశారు. బహిరంగంగా క్షమాపణ చెప్పకపోవడంతో తాజాగా ప్రజాప్రతినిధుల కోర్టును ఆశ్రయించినట్లు సమాచారం.

కేసులో భాగంగా హరీశ్‌రావు కోర్టుకు హాజరై తన స్టేట్‌మెంట్‌ ఇవ్వనున్నారు. తన రాజకీయ ప్రతిష్ఠను దెబ్బతీసేలా నిరాధారమైన ఆరోపణలు చేశారని ఆయన ఆరోపిస్తున్నారు. మరోవైపు, తాను చేసిన వ్యాఖ్యలకు కట్టుబడి ఉంటానని మహేష్‌కుమార్‌ గౌడ్‌ గతంలో స్పష్టం చేశారు. ఈ ఆరోపణలకు సంబంధించి ఆధారాలు బహిరంగంగా వెల్లడించలేదని తాజా నివేదికలు పేర్కొంటున్నాయి.