విమాన టికెట్ ధరల నియంత్రణకు కేంద్రం కొత్త నిబంధనలు

విమాన టికెట్ల ధరలు అనూహ్యంగా పెరగకుండా నియంత్రించడంతో పాటు ఛార్జీల విషయంలో పారదర్శకతను పెంచేందుకు కేంద్ర ప్రభుత్వం ‘భారతీయ వాయుయాన్‌ అధినియమ్‌-2026’ నిబంధనలను నోటిఫై చేసింది. పశ్చిమాసియాలో ఉద్రిక్తతలు, ముడి చమురు ధరల్లో మార్పుల కారణంగా విమాన ఛార్జీలు పెరుగుతున్న నేపథ్యంలో ఈ నిర్ణయం తీసుకుంది. అసాధారణ పరిస్థితుల్లో ప్రజాప్రయోజనాల దృష్ట్యా జోక్యం అవసరమని భావిస్తే విమానయాన సంస్థలకు కేంద్రం ఆదేశాలు జారీ చేయవచ్చు. టికెట్ ధరలపై నిర్దిష్ట గరిష్ఠ పరిమితిని విధించకపోయినా, ఛార్జీలను పర్యవేక్షించి అవసరమైన చర్యలు తీసుకునేందుకు ప్రత్యేక అధికారులు ఉంటారు. ఈ కొత్త నిబంధనలు 2027 జనవరి 1 నుంచి అమల్లోకి రానున్నాయి. బ్రిటిష్‌ కాలం నాటి విమానయాన చట్టం స్థానంలో కేంద్రం 2024లో భారతీయ వాయుయాన్‌ అధినియమ్‌ను తీసుకొచ్చింది.

కొత్త నిబంధనల ప్రకారం విమానయాన సంస్థలు తమ వెబ్‌సైట్లు, డిజిటల్‌ వేదికల్లో టికెట్‌ ధరలను తప్పనిసరిగా ప్రచురించాలి. ఛార్జీలను పర్యవేక్షించే బాధ్యతను డైరెక్టరేట్‌ జనరల్‌ ఆఫ్‌ సివిల్‌ ఏవియేషన్‌ (డీజీసీఏ) నిర్వహిస్తుంది. విమానయాన సంస్థలు తమ కార్యకలాపాల ఖర్చుల ఆధారంగా టికెట్‌ ధరలను నిర్ణయించి, సంబంధిత వివరాలను డీజీసీఏకు సమర్పించాలి. ప్రయాణికులు బుకింగ్‌ సమయంలో చెల్లించాల్సిన మొత్తం ధరను స్పష్టంగా చూపించడంతో పాటు టికెట్‌పైనా పేర్కొనాలి. బేస్‌ ఫేర్‌, పన్నులు, ఇతర రుసుములు, టికెట్‌ రద్దు ఛార్జీలు, రీఫండ్‌ వివరాలను విడివిడిగా వెల్లడించాలి. ప్రభుత్వ పన్నులు, విమానయాన సంస్థలు వసూలు చేసే సేవా రుసుముల మధ్య తేడాను కూడా స్పష్టంగా చూపించాలి. అధిక డిమాండ్‌ ఉన్న సమయంలో విమాన టికెట్‌ ధరలు భారీగా పెరుగుతున్నాయని, వాటిని నియంత్రించాలని కోరుతూ సుప్రీంకోర్టులో దాఖలైన ప్రజాప్రయోజన వ్యాజ్యం ప్రస్తుతం విచారణలో ఉంది.