అక్కడ $1 మిలియన్.. కానీ నేటి నుంచే అసలైన పరీక్ష !

విక్టరీ వెంకటేష్, త్రివిక్రమ్ శ్రీనివాస్ కాంబినేషన్‌లో వచ్చిన తాజా చిత్రం ‘ఆదర్శ కుటుంబం’ బాక్సాఫీస్ వద్ద మరో కీలక మైలురాయిని అందుకుంది. అమెరికాలో ఈ సినిమా $1 మిలియన్ గ్రాస్ వసూళ్లను దాటింది. వెంకటేష్ కెరీర్‌లో ఈ ఘనత సాధించిన ఐదో చిత్రంగా నిలిచింది. ప్రపంచవ్యాప్తంగా సినిమా వసూళ్లు సుమారు రూ. 50 కోట్ల గ్రాస్‌కు చేరువలో ఉన్నట్లు సమాచారం. అయితే చిత్ర బృందం ఇప్పటివరకు అధికారిక వసూళ్ల వివరాలను వెల్లడించలేదు. మరోవైపు, బుక్‌మైషోలో ఈ సినిమాకు సంబంధించి 10 లక్షలకు పైగా టికెట్లు అమ్ముడయ్యాయి.

ఇప్పటివరకు సినిమా ప్రదర్శన ఆశాజనకంగానే ఉన్నప్పటికీ, అసలైన బాక్సాఫీస్ పరీక్ష ఇకపై మొదలుకానుంది. ఈ గురువారం ‘రామాయణ’ విడుదల కానుండటంతో తెలుగు రాష్ట్రాల్లో ప్రేక్షకుల దృష్టి ఆ సినిమాపైకి మళ్లే అవకాశం ఉంది. దీంతో ‘ఆదర్శ కుటుంబం’కు కేటాయించిన స్క్రీన్ల సంఖ్య తగ్గవచ్చని అంచనా. ఈ చిత్రంలో నివేథా పేతురాజ్, నారా రోహిత్, పూజిత పొన్నాడ, రావు రమేష్, బ్రహ్మాజీ కీలక పాత్రల్లో నటించారు. హారిక అండ్ హాసిని క్రియేషన్స్ నిర్మించిన ఈ సినిమాకు థమన్ సంగీతం అందించారు.