రష్యా చమురు సరఫరాకు గ్రీన్ సిగ్నల్

క్యూబాకు చమురు రవాణాపై విధించిన ఆంక్షలను అమెరికా సడలించింది. రష్యా నుంచి చమురు సరఫరా జరగడంపై తనకు ఎలాంటి అభ్యంతరం లేదని అమెరికా అధ్యక్షుడు డొనాల్డ్ ట్రంప్ తెలిపారు. 7.3 లక్షల బ్యారెళ్ల ముడి చమురుతో ‘అనటోలీ కొలోడ్కిన్’ అనే నౌక ఈ నెలలో రష్యా నుంచి బయల్దేరి ఇంగ్లిష్ ఛానల్ మీదుగా అట్లాంటిక్ మహాసముద్రంలోకి ప్రవేశించింది. ఆంక్షల నేపథ్యంలో ఈ నౌక క్యూబాకు చేరుతుందా అనే అనుమానాలు ఉన్న సమయంలో ట్రంప్ ఈ వ్యాఖ్యలు చేశారు.

ట్రంప్ ప్రకటన అనంతరం అమెరికా ఈ రష్యా నౌకకు అనుమతి ఇచ్చింది, ఇది త్వరలోనే క్యూబాకు చేరుకునే అవకాశం ఉంది. క్యూబా ప్రభుత్వంపై కూడా ట్రంప్ విమర్శలు చేస్తూ త్వరలోనే అది కుప్పకూలుతుందని వ్యాఖ్యానించారు. వెనెజువెలా అధ్యక్షుడు మదురోపై చర్యల తర్వాత క్యూబాకు చమురు సరఫరా అంతరాయం ఏర్పడింది. గతంలో క్యూబాకు చమురు అందించే దేశాలపై అధిక సుంకాలు విధిస్తామని అమెరికా హెచ్చరించిన విషయం తెలిసిందే. తాజా నిర్ణయం అంతర్జాతీయ రాజకీయాల్లో కీలక మార్పుగా భావిస్తున్నారు.