జెన్‌జీపై రాజకీయ పార్టీల ఫోకస్‌.. చిరాగ్‌ పాస్వాన్‌ ‘యూత్ బోలే తో’

దేశ రాజకీయాల్లో విద్యార్థులు, యువత, ముఖ్యంగా జెన్‌జీపై రాజకీయ పార్టీల దృష్టి పెరుగుతోంది. కాంగ్రెస్‌ నేత రాహుల్‌ గాంధీ ‘చత్రోన్‌ కీ గూంజ్‌’ కార్యక్రమాల ద్వారా విద్య, ఉద్యోగాలు, పోటీ పరీక్షలు, విద్యార్థుల భవిష్యత్తు వంటి అంశాలపై యువతతో నేరుగా సంభాషిస్తున్నారు. ఈ కార్యక్రమాన్ని దేశవ్యాప్తంగా విస్తరించేందుకు కాంగ్రెస్‌ ప్రణాళికలు రూపొందిస్తున్నట్లు ఇప్పటికే వార్తలు వచ్చాయి.

ఇదే సమయంలో ఎన్డీయే మిత్రపక్షమైన లోక్‌ జనశక్తి పార్టీ (రామ్‌విలాస్‌) అధినేత, కేంద్ర మంత్రి చిరాగ్‌ పాస్వాన్‌ ‘Yయూత్ బోలే తో’ పేరుతో యువతతో ప్రత్యక్ష సంభాషణకు శ్రీకారం చుట్టనున్నారు. సెప్టెంబర్‌ 24న పాట్నాలోని వెటర్నరీ కాలేజ్‌ గ్రౌండ్‌లో తొలి కార్యక్రమం జరగనుంది. ఇందులో విద్య, ఉద్యోగాలు, నైపుణ్యాభివృద్ధి, ఎంటర్‌ప్రెన్యూర్‌షిప్‌, టెక్నాలజీ, డిజిటల్‌ యుగంలో ఎదురవుతున్న సవాళ్లపై యువతతో చర్చించనున్నారు. యువత తమ ప్రశ్నలు, అభిప్రాయాలు, సూచనలను నేరుగా చిరాగ్‌ పాస్వాన్‌ ముందుంచేలా కార్యక్రమాన్ని రూపొందించారు. పార్టీ వర్గాల ప్రకారం, అనంతరం ఇతర ప్రాంతాల్లోనూ ఇలాంటి కార్యక్రమాలను నిర్వహించనున్నారు.