సిక్కుల ఊచకోతపై క్షమాపణ చెప్పరా?.. సోనియా ఆత్మకథపై హర్‌సిమ్రత్ విమర్శ

కాంగ్రెస్ మాజీ చీఫ్ సోనియా గాంధీ ఆత్మకథ ‘బిలాంగింగ్: ఎ జర్నీ ఆఫ్ లవ్’ పై విమర్శలు వస్తూనే ఉన్నాయి. తాజాగా శిరోమణి అకాలీ దళ్ నేత, ఎంపీ హర్‌సిమ్రత్ బాదల్ ఆ పుస్తకంపై పలు విమర్శలు చేశారు. సిక్కుల ఊచకోతను చిన్న విషయంగా పేర్కొన్నారని, ఆ దారుణ ఘటన జరిగి 40 ఏళ్లయినా సోనియా గాంధీ ఇప్పటి వరకూ కనీసం క్షమాపణ కూడా చెప్పలేదని ఆమె ‘ఎక్స్’లో మండిపడ్డారు. 1984లో జరిగిన ఆ దారుణ ఊచకోతను పంజాబ్ మరువదని, దోషులను క్షమించదని పేర్కొన్నారు.

కాగా.. 1984లో నాటి ప్రధాని ఇందిరా గాంధీ హత్య తర్వాత పంజాబ్‌లో సిక్కుత ఊచకోత జరిగిన విషయం తెలిసిందే. ఆ ఘటనను సోనియా తన ఆత్మకథలో ప్రస్తావించారు. అదొక విషాదకరమైన, సిగ్గుమాలిన అధ్యాయంగా సోనియా అభివర్ణించారు. నాలుగు దశాబ్దాల తర్వాత కూడా సిక్కులకు తగిన న్యాయం జరగలేదని పేర్కొన్నారు. ఆ హింసాత్మక ఘటనల్లో కాంగ్రెస్ కార్యకర్తల హస్తం ఉందని ఆమె ఒప్పుకున్నారు. ఇందిర హత్య తర్వాత చాలా మంది కోపోద్రిక్తులయ్యారని, తర్వాత పంజాబ్‌లో చాలా మంది సిక్కులను చంపారని చెప్పారు. ఒక్క రాజధానిలోనే 2 వేల మంది అమాయక సిక్కులు ప్రాణాలు కోల్పోయారని తెలిపారు. తర్వాత రాజీవ్ గాంధీ టీవీలో ఒక ప్రకటన చేశారని, అందరూ శాంతి సంయమనాన్ని పాటించాలని ఆయన విజ్ఞప్తి చేశారని గుర్తుచేశారు. సిక్కులపై రాజీవ్‌కు ఎలాంటి ద్వేషం, దురభిమానం లేదని సోనియా పేర్కొన్నారు.