OTTలో ఓకేరోజు రెండు హిట్‌ సినిమాలు... ప్రేక్షకులకు డబుల్ ట్రీట్!

ఈ సంక్రాంతి సీజన్‌లో బాక్సాఫీస్‌ను ఊపేసిన చిరంజీవి నటించిన మన శంకర వర ప్రసాద్ గారు మరియు నవీన్ పోలిశెట్టి నటించిన అనగనగ ఒక రాజు ఇప్పుడు OTTలోకి రాబోతున్నాయి. థియేటర్లలో ఈ సినిమాలను మిస్ అయినవారికి, లేదా మళ్లీ చూడాలనుకున్న ప్రేక్షకులకు ఇది నిజంగా శుభవార్త. ఈ రెండు విజయవంతమైన సినిమాలు వేర్వేరు OTT ప్లాట్‌ఫామ్‌లలో ఒకే రాత్రి ప్రీమియర్ కానుండటం విశేషం.

అనిల్ రావిపూడి దర్శకత్వంలో రూపొందిన ఫ్యామిలీ ఎంటర్‌టైనర్ మన శంకర వర ప్రసాద్ గారు ఈ నెల 11 నుంచి ZEE5 లో స్ట్రీమింగ్ కానుంది. అంటే నేటి అర్ధరాత్రి నుంచే ప్రేక్షకులు ఈ సినిమాను చూడవచ్చు. తెలుగు, హిందీ, తమిళం, కన్నడ, మలయాళంతో పాటు మరాఠీ, బెంగాలీ భాషల్లో కూడా ఈ చిత్రం అందుబాటులోకి రానుంది. చిరంజీవితో పాటు వెంకటేష్ కీలక పాత్రలో నటించగా, నయనతార తన నటనతో ప్రేక్షకులను ఆకట్టుకుంది. థియేటర్లలో రూ.375 కోట్లకు పైగా వసూళ్లు సాధించిన ఈ సినిమా OTTలో కూడా భారీ వ్యూస్ సాధిస్తుందని అంచనాలు ఉన్నాయి.

ఇక నవీన్ పోలిశెట్టి నటించిన అనగనగ ఒక రాజు కూడా సంక్రాంతికి థియేటర్లలో మంచి విజయం సాధించింది. మారి దర్శకత్వం వహించిన ఈ గ్రామీణ రాజకీయ హాస్య చిత్రంలో మీనాక్షి చౌదరి హీరోయిన్‌గా నటించింది. ఈ సినిమా కూడా నేటి అర్ధరాత్రి నుంచి నెట్‌ఫ్లిక్స్‌లో స్ట్రీమింగ్ కానుంది. తెలుగు, తమిళం, కన్నడ, మలయాళం, హిందీ భాషల్లో అందుబాటులో ఉండే ఈ రెండు సినిమాలు ఒకే రోజు OTTలోకి రావడంతో ప్రేక్షకులకు ఇది నిజంగా డబుల్ ట్రీట్‌గా మారింది. ఈ వీకెండ్‌లో కుటుంబంతో కలిసి చూసేందుకు ఇవి మంచి ఎంపికగా నిలవనున్నాయి.