ఆ నమ్మకంతోనే వెంటనే ఒప్పుకున్నా.. ‘ది ట్రెయిటర్స్‌’పై తేజ సజ్జ!

‘ది ట్రెయిటర్స్‌ తెలుగు’ రియాలిటీ షోకు హోస్ట్‌గా వ్యవహరిస్తున్న తేజ సజ్జ తన నిర్ణయం వెనుక ఉన్న కారణాలను వెల్లడించారు. ‘మిరాయ్‌’ సినిమా పూర్తయిన తర్వాత అమెజాన్‌ ప్రైమ్‌ వీడియో నుంచి ఈ షోకు హోస్ట్‌గా అవకాశం వచ్చినట్లు తెలిపారు. ప్రపంచవ్యాప్తంగా విజయవంతమైన ‘ది ట్రెయిటర్స్‌’ ఫ్రాంచైజ్‌ 20కి పైగా దేశాల్లో, 25కి పైగా భాషల్లో రూపొందిందని చెప్పారు. హిందీలో కరణ్‌ జోహార్‌ హోస్ట్‌గా చేసిన సీజన్‌లో ఒక ఎపిసోడ్‌ చూసిన తర్వాత తనకు ఈ కాన్సెప్ట్‌ బాగా నచ్చిందని, రెండు రోజుల్లో మొత్తం సీజన్‌ పూర్తి చేశానని తేజ తెలిపారు.

ఈ ఫార్మాట్‌పై ఉన్న నమ్మకంతోనే తాను వెంటనే హోస్ట్‌గా అంగీకరించానని తేజ సజ్జ పేర్కొన్నారు. తెలుగులో ఇంత పెద్ద స్థాయిలో ఇలాంటి రియాలిటీ షోను ఇంతకుముందు చూడలేదని, ఇది సాధారణ గేమ్‌ షోలా కాకుండా మర్డర్‌ మిస్టరీ లేదా థ్రిల్లర్‌ సినిమా చూస్తున్న అనుభూతిని కలిగిస్తుందని అన్నారు. వివిధ రంగాలకు చెందిన 20 మంది సెలబ్రిటీలు పాల్గొంటున్న ఈ షో మొత్తం 10 ఎపిసోడ్లుగా రూపొందింది. అక్టోబర్‌ 15 నుంచి ప్రతి గురువారం కొత్త ఎపిసోడ్‌ విడుదల కానుంది. ఇదిలా ఉండగా, తేజ సజ్జ హీరోగా నటిస్తున్న ‘జాంబీ రెడ్డి 2’ షూటింగ్‌ ఇటీవల ప్రారంభమైంది.