‘ది ట్రెటర్స్ తెలుగు’తో ఓటీటీలోకి తేజ సజ్జా..

యువ కథానాయకుడు తేజ సజ్జా ఓటీటీ వేదికపై సరికొత్త ప్రయాణానికి సిద్ధమయ్యారు. ప్రముఖ రియాలిటీ షో ‘ది ట్రెటర్స్‌’కు తెలుగు వెర్షన్‌గా రూపొందిన ‘ది ట్రెటర్స్‌ తెలుగు’లో ఆయన హోస్ట్‌గా వ్యవహరించనున్నారు. ఈ షో ప్రముఖ ఓటీటీ వేదిక ప్రైమ్ వీడియోలో ఈ నెల 15 నుంచి ప్రతి గురువారం మధ్యాహ్నం 12 గంటలకు స్ట్రీమింగ్ కానుంది. ఈ నేపథ్యంలో మంగళవారం హైదరాబాద్‌లో షో ట్రైలర్‌ను విడుదల చేశారు.

ఈ సందర్భంగా తేజ సజ్జా మాట్లాడుతూ, ‘ది ట్రెటర్స్‌’ ఇప్పటికే పలు భాషల్లో మంచి విజయాన్ని అందుకున్న రియాలిటీ షో అని తెలిపారు. ‘ది ట్రెటర్స్‌ తెలుగు’కు హోస్ట్‌గా వ్యవహరించడం తనకు కొత్త అనుభవమని, ఈ షో ద్వారా తెలుగు ప్రేక్షకులకు మంచి థ్రిల్‌ను అందించనుండటం ఆనందంగా ఉందని చెప్పారు. తొలి సీజన్‌ను మొత్తం 10 ఎపిసోడ్లుగా రూపొందించారు.