అఖిల్ ‘లెనిన్’కు ఓటీటీలోనూ అదిరిపోయే రెస్పాన్స్

అఖిల్ అక్కినేని సెన్సేషనల్ బ్లాక్‌బస్టర్ ‘లెనిన్’ ఓటీటీలోనూ దూసుకుపోతోంది. థియేటర్లలో రూ.100 కోట్లకు పైగా వసూళ్లు సాధించిన ఈ చిత్రం ఆగస్టు 7 నుంచి ప్రముఖ ఓటీటీ ప్లాట్‌ఫామ్ జీ5లో స్ట్రీమింగ్ అవుతోంది. తాజాగా కేవలం రెండు రోజుల్లోనే 100 మిలియన్ స్ట్రీమింగ్ మినిట్స్‌ను దాటినట్లు జీ5 ప్రకటించింది. దీంతో థియేటర్ల తర్వాత ఓటీటీలోనూ ‘లెనిన్’కు వస్తున్న ఆదరణపై ఆసక్తి నెలకొంది.

అన్నపూర్ణ స్టూడియోస్ సమర్పణలో మనం ఎంటర్‌ప్రైజెస్ ఎల్ఎల్‌పీ, సితార ఎంటర్‌టైన్‌మెంట్స్ బ్యానర్లపై అక్కినేని నాగార్జున, సూర్యదేవర నాగ వంశీ నిర్మించిన ఈ చిత్రానికి మురళీ కిషోర్ అబ్బూరు దర్శకత్వం వహించారు. చిత్తూరు జిల్లా రామచంద్రపురం గ్రామంలోని ద్రౌపదమ్మ తిరునాళ్ల నేపథ్యంలో తెరకెక్కిన ఈ సినిమాలో స్నేహం, ద్రోహం, కోపం, పగ, ప్రతీకారం ప్రధాన అంశాలుగా ఉన్నాయి. అఖిల్ రా అండ్ రస్టిక్ నటన, భాగ్యశ్రీ బోర్సే నటన, తమన్ సంగీతం, నేపథ్య సంగీతం, లియోన్ బ్రిట్టో కెమెరావర్క్, నవీన్ నూలి ఎడిటింగ్‌కు మంచి స్పందన లభించింది.