నాని కోసం కథ సిద్ధం చేస్తున్న హను?

ప్రభాస్‌తో ఫౌజీ చిత్రాన్ని తెరకెక్కిస్తున్న దర్శకుడు హను రాఘవపూడి తన తదుపరి సినిమాలపై కూడా ప్రత్యేక ప్రణాళికలు రూపొందిస్తున్నట్లు తెలుస్తోంది. ముఖ్యంగా నాని కోసం గతంలో సిద్ధం చేసిన ఓ కథను ఇప్పుడు మళ్లీ తెరపైకి తీసుకొచ్చే ఆలోచనలో ఉన్నారనే ప్రచారం మొదలైంది. గతంలో ఈ ఇద్దరి కలయికలో వచ్చిన కృష్ణగాడి వీర ప్రేమకథ సినిమా మంచి విజయం సాధించింది. మళ్ళీ ఈ కాంబోలో మరో సినిమా వస్తే ప్రేక్షకులకు మరో విభిన్నమైన కథను అందించే అవకాశం ఉందని అభిమానులు భావిస్తున్నారు. అయితే దీనిపై ఇప్పటివరకు అధికారిక ప్రకటన వెలువడలేదు.

పడి పడి లేచే మనసు తర్వాత హను రాఘవపూడి ఓ సిన్సియర్ ఆర్మీ అధికారి కథను నానికి వినిపించారట. ఇతర సినిమాల కమిట్‌మెంట్స్ కారణంగా అప్పట్లో ఆ ప్రాజెక్ట్ కార్యరూపం దాల్చలేదు. ఆ కథలోని కొన్ని అంశాల ఆధారంగానే సీతా రామం రూపొందినట్లు సమాచారం. ప్రస్తుతం ప్రభాస్‌తో ఫౌజీ చేస్తున్నారు. రెండో ప్రపంచ యుద్ధం నేపథ్యంలో సాగే ఈ చిత్రంలో ప్రభాస్ బ్రిటిష్ సైన్యంలో పనిచేసే అధికారిగా కనిపించనున్నారు. ఈ సినిమా పూర్తయ్యాక నాని కోసం రాసుకున్న కథను తెరకెక్కించాలని దర్శకుడు భావిస్తున్నట్లు టాక్.