ఇరాన్, ఇజ్రాయెల్ యుద్ధం.. 2.6 లక్షల మంది భారతీయులు వెనక్కి

పశ్చిమాసియాలో ఉద్రిక్త పరిస్థితులు కొనసాగుతున్న నేపథ్యంలో, ఫిబ్రవరి 28 తర్వాత సుమారు 2.6 లక్షల మంది భారతీయులు సురక్షితంగా స్వదేశానికి చేరుకున్నారని కేంద్ర ప్రభుత్వం తెలిపింది. ఈ విషయాన్ని ఢిల్లీలో జరిగిన సమావేశంలో విదేశాంగ శాఖ అదనపు కార్యదర్శి (గల్ఫ్‌) అసీమ్ ఆర్. మహాజన్ వెల్లడించారు.

యూఏఈలోని వివిధ విమానాశ్రయాల నుంచి భారత్‌కు ప్రస్తుతం 70 విమాన సర్వీసులు నడుస్తున్నాయని ఆయన తెలిపారు. ఖతార్ గగనతలం కొంతమేర తెరవబడడంతో పరిమితంగా విమానాలు నడుస్తున్నాయి. ఈ రోజు ఖతార్ ఎయిర్‌వేస్ భారత్‌కు 5 విమానాలు నడిపితే, రేపు 9 సర్వీసులు నడుపుతున్నట్లు ప్రకటించింది.

అయితే, కువైట్ గగనతలం ఫిబ్రవరి 28 నుంచి మూసివేయబడి ఉండటంతో ప్రయాణాలకు ఇబ్బందులు ఏర్పడ్డాయి. కొన్ని దేశాల్లో ఇంకా విమాన సర్వీసులు తాత్కాలికంగా నిలిచిపోయినప్పటికీ, మొత్తం మీద పరిస్థితి క్రమంగా మెరుగుపడుతోంది. దీంతో విదేశాల్లో ఉన్న భారతీయులు స్వదేశానికి చేరుకోవడం సులభమవుతోంది.