జపాన్ మీ ప్రేమ కు థాంక్స్ - హీరోయిన్ రష్మిక మందన్న!

నేషనల్ క్రష్ రష్మిక మందన్న మరోసారి తన అంతర్జాతీయ స్థాయి క్రేజ్‌ను చాటుకున్నారు. ఐకాన్ స్టార్ అల్లు అర్జున్‌తో కలిసి ఆమె నటించిన బ్లాక్‌బస్టర్ చిత్రం పుష్ప 2: ది రూల్ ప్రమోషన్ల కోసం ఇటీవల జపాన్‌కు వెళ్లారు. ఈ నెల 16 న అక్కడ సినిమా విడుదల కావడంతో నిర్వహించిన ప్రచార కార్యక్రమాల్లో రష్మికకు జపాన్ అభిమానుల నుంచి ఊహించని స్థాయిలో ఆదరణ లభించింది.

ఒక్కరోజు పర్యటన అయినప్పటికీ ఆమెను చూసేందుకు అభిమానులు భారీగా తరలివచ్చారు. అభిమానులు అందించిన లేఖలు, బహుమతులు రష్మికను తీవ్రంగా భావోద్వేగానికి గురిచేశాయి. వాటిని అక్కడే వదిలివేయలేక, అన్నింటినీ భద్రంగా తనతో పాటు ఇంటికి తీసుకువచ్చినట్లు ఆమె సోషల్ మీడియా ద్వారా వెల్లడించారు. ఇన్‌స్టాగ్రామ్ స్టోరీస్‌లో షేర్ చేసిన నోట్ అభిమానులను మరింత ఆకట్టుకుంది.

జపాన్ అభిమానులకు కృతజ్ఞతలు తెలుపుతూ రష్మిక త్వరలోనే మళ్లీ తిరిగి వస్తానని హామీ ఇచ్చారు. ఈసారి ఎక్కువ రోజులు ఉండేలా ప్రణాళిక వేసుకుంటానని, మరిన్ని జపనీస్ పదాలు నేర్చుకుని వస్తానని పేర్కొన్నారు. ఈ సందర్భంగా అల్లు అర్జున్‌తో కలిసి పుష్ప 2 ఐకానిక్ పోజ్‌లో దిగిన ఫోటోలను “థ్యాంక్యూ టోక్యో” క్యాప్షన్‌తో పోస్ట్ చేశారు. ఈ సంఘటన ప్రపంచవ్యాప్తంగా తెలుగు సినిమాకు పెరుగుతున్న ఆదరణకు నిదర్శనంగా నిలిచింది.