ఇలాంటి కామెంట్స్ తీవ్ర నిరాశ కలిగిస్తాయి: శోభిత

మహిళల శరీరాకృతిపై సోషల్‌ మీడియాలో వచ్చే ట్రోలింగ్‌, విమర్శలపై నటి శోభిత ధూళిపాళ్ల స్పందించారు. ఇటీవల ఓ ఇంటర్వ్యూలో పాల్గొన్న ఆమె.. కత్రినా కైఫ్‌ ప్రసవానంతర శరీరాకృతిపై వచ్చిన కామెంట్లను ప్రస్తావిస్తూ ఇలాంటి విమర్శలు ఒక మహిళగా తీవ్ర నిరాశకు గురిచేస్తాయని అన్నారు. మహిళలు బలంగా ఉండాలని, అదే సమయంలో సున్నితంగా ఉండాలని సమాజం ఎన్నో రకాల అంచనాలు పెడుతుందని పేర్కొన్నారు. అయితే ప్రతి మహిళ ఇలాంటి పరిస్థితులను తనదైన రీతిలో ఎదుర్కొంటుందని, విమర్శలు ఎదురైనప్పుడు ప్రతి ఒక్కరూ తమకు అర్థవంతంగా అనిపించే విధంగా స్పందిస్తారని శోభిత చెప్పారు.

ప్రస్తుతం శోభిత తమిళంలో పా. రంజిత్‌ దర్శకత్వంలో తెరకెక్కుతున్న ‘వెట్టువం’ చిత్రంలో నటిస్తున్నారు. ఇందులో నటుడు ఆర్య కీలక పాత్ర పోషిస్తున్నారు. మరోవైపు కత్రినా కైఫ్‌పై వచ్చిన బాడీ షేమింగ్‌ కామెంట్లకు పలువురు బాలీవుడ్‌ ప్రముఖులు మద్దతుగా నిలిచారు. పరిణీతి చోప్రా ప్రసవం తర్వాత మహిళల శరీరంలో వచ్చే మార్పులపై విమర్శలు చేయడం సరికాదని పేర్కొన్నారు. గర్భధారణ, ప్రసవం వల్ల వచ్చే మార్పులను ప్రతికూలంగా చూడకుండా వాటిని గౌరవించాలని సూచించారు. కత్రినాపై వచ్చిన ట్రోలింగ్‌ను సల్మాన్‌ ఖాన్‌ కూడా ఖండించారు. 2025 నవంబర్‌లో కత్రినా తన బిడ్డకు జన్మనిచ్చిన విషయం తెలిసిందే. అనంతరం ఇటీవల ఓ అంబానీ కుటుంబ గణేశ్‌ చతుర్థి వేడుకలో ఆమె కనిపించడంతో, ఆమె శరీరాకృతిపై సోషల్‌ మీడియాలో ట్రోలింగ్‌ జరిగింది.