చివరి దశలో ‘శక్తి శాలిని’ షూటింగ్

మడాక్ హారర్ కామెడీ యూనివర్స్ ఫ్రాంచైజీలో భాగంగా రాబోతున్న కొత్త చిత్రం శక్తి శాలిని ప్రేక్షకుల్లో ఆసక్తిని రేకెత్తిస్తోంది. ‘సైయారా’ విజయంతో బాలీవుడ్‌లో గుర్తింపు పొందిన కథానాయిక అనీత్ పడ్డా ఈ సినిమాలో ప్రధాన పాత్రలో నటిస్తోంది. ఆదిత్య సర్పోత్దార్ దర్శకత్వం వహిస్తున్న ఈ చిత్రాన్ని వచ్చే ఏడాది జనవరిలో థియేటర్లలో విడుదల చేయాలని చిత్రబృందం ప్రణాళిక చేస్తోంది. ప్రస్తుతం చివరి షెడ్యూల్ షూటింగ్ పూర్తిచేసే దశలో ఉంది.

ఈ చిత్రంలో అనీత్ పడ్డా ద్విపాత్రాభినయంలో కనిపించనున్నారని సమాచారం. మంచి, చెడు మధ్య జరిగే శాశ్వత పోరాటం చుట్టూ కథ సాగుతుందని ప్రచారం జరుగుతోంది. ఈ ఫ్రాంచైజీని మరింత గాఢమైన కథాంశంతో ముందుకు తీసుకెళ్లాలనే లక్ష్యంతో ఈ సినిమాను రూపొందిస్తున్నారని తెలుస్తోంది. పోస్ట్ ప్రొడక్షన్ పనులు త్వరలో ప్రారంభం కానున్నాయి.