‘డ్రాగన్‌’ అణుబాంబులా ఉంటుంది: రాజీవ్‌ కనకాల

జూనియర్‌ ఎన్టీఆర్‌, స్టార్‌ డైరెక్టర్‌ ప్రశాంత్‌ నీల్‌ కాంబినేషన్‌లో తెరకెక్కుతున్న భారీ పాన్‌ ఇండియా చిత్రం ‘డ్రాగన్‌’పై నటుడు రాజీవ్‌ కనకాల ఆసక్తికర వ్యాఖ్యలు చేశారు. ఈ సినిమాలో కీలక పాత్ర పోషిస్తున్న ఆయన తాజాగా ఓ ఇంటర్వ్యూలో సినిమా విశేషాలను పంచుకున్నారు. ‘డ్రాగన్‌’ అద్భుతంగా రూపుదిద్దుకుంటోందని, ఎన్టీఆర్‌, ప్రశాంత్‌ నీల్‌, ఎన్టీఆర్‌ ఆర్ట్స్‌, మైత్రి మూవీ మేకర్స్‌ కలయికతో సినిమా మరో స్థాయిలో ఉంటుందని అన్నారు. ఒక రకంగా చెప్పాలంటే అణుబాంబులా ఉంటుందని, అభిమానులు మరోసారి కాలర్లు ఎగరేసుకునేలా సినిమా ఉంటుందని పేర్కొన్నారు.

ఇప్పటికే తనకు సంబంధించిన ఎనిమిది రోజుల షూటింగ్‌లో పాల్గొన్నానని, ఇంకా కొంత భాగం చిత్రీకరించాల్సి ఉందని రాజీవ్‌ కనకాల వెల్లడించారు. కొన్ని సమస్యల కారణంగా షూటింగ్‌కు విరామం వచ్చిందని, వచ్చే నెలలో తిరిగి ప్రారంభం కానుందని తెలిపారు. ఈ చిత్రంలో ఎన్టీఆర్‌కు జోడీగా రుక్మిణి వసంత్‌ నటిస్తుండగా.. అనిల్‌ కపూర్‌, బిజూ మీనన్‌, ఖుష్బూ సుందర్‌, గురు సోమసుందరం, అశుతోష్‌ రాణా, సిద్ధాంత్‌ గుప్తా, ప్రభాస్‌ శ్రీను తదితరులు కీలక పాత్రల్లో కనిపించనున్నారు. ఈ సినిమా వచ్చే ఏడాది జూన్‌ 11న ప్రేక్షకుల ముందుకు రానుంది.