సౌత్ డైరెక్టర్‌పై నీతి టేలర్ సంచలన ఆరోపణలు

టెలివిజన్ రంగంతో పాటు కొన్ని దక్షిణాది చిత్రాల్లో నటించి గుర్తింపు తెచ్చుకున్న నటి నీతి టేలర్‌ తన కెరీర్‌ ప్రారంభంలో ఎదుర్కొన్న చేదు అనుభవాన్ని తాజాగా వెల్లడించారు. ఒక దక్షిణాది దర్శకుడు రెండో సినిమా కోసం ఫోన్‌లో సంప్రదించినప్పుడు, తనతో అనుచితంగా మాట్లాడాడని ఆమె ఆరోపించారు. ఆ సంభాషణ తనను తీవ్ర దిగ్భ్రాంతికి గురిచేసిందని, అప్పట్లో ఎలా స్పందించాలో కూడా అర్థం కాలేదని నీతి టేలర్‌ తెలిపారు. ఆమె వెల్లడించిన విషయాలకు సంబంధించిన వీడియోలు ప్రస్తుతం సామాజిక మాధ్యమాల్లో చర్చకు దారితీశాయి.

ఆ సినిమాలో అవకాశం రావాలంటే తనతో శారీరక సంబంధం పెట్టుకోవాలని దర్శకుడు చెప్పినట్లు నీతి టేలర్‌ ఆరోపించారు. ఆ మాటలు విన్న వెంటనే తాను అతని నంబర్‌ను బ్లాక్‌ చేసి, జరిగిన విషయాన్ని తన తల్లికి ఫోన్‌ చేసి చెప్పినట్లు వివరించారు. అంతకుముందు ఆ దర్శకుడు ఇతరులతోనూ అనుచితంగా ప్రవర్తించడం చూసినప్పటికీ, తనకు కూడా అలాంటి అనుభవం ఎదురవుతుందని ఊహించలేదని అన్నారు. ఆ ఘటన తనను సినిమాలకు దూరం చేసిందని, ఇకపై సినిమాల్లో నటించకూడదని అప్పట్లో నిర్ణయించుకున్నానని తెలిపారు. అయితే, ఆ దర్శకుడి పేరును మాత్రం ఆమె వెల్లడించలేదు. ఈ వ్యాఖ్యలు ప్రస్తుతం నెట్టింట విస్తృత చర్చకు కారణమయ్యాయి.