తెలుగు హీరోగా ఎంట్రీ ఇస్తున్న కింగ్డమ్ ఫేమ్ వెంకటేష్!

వెంకటేష్.వి.పి. మలయాళ టెలివిజన్, చిత్ర పరిశ్రమలో తనకంటూ గుర్తింపు తెచ్చుకున్నారు. అంతేకాకుండా సుడా సుడా ఇడ్లీ అనే రెస్టారెంట్ స్టార్టప్‌ను విజయవంతంగా నిర్వహిస్తున్నారు. విజయ్ దేవరకొండ హీరోగా నటించిన ‘కింగ్డమ్’లో మురుగన్ పాత్రలో కనిపించి తెలుగు ప్రేక్షకులకు కూడా దగ్గరయ్యారు. ఇప్పుడు హీరోగా తన అదృష్టాన్ని పరీక్షించుకునేందుకు సిద్ధమవుతున్నారు. డి.జి.పి. అనే వర్కింగ్ టైటిల్‌తో తెరకెక్కనున్న చిత్రంలో ఆయన కథానాయకుడిగా నటించనున్నారు. కె ర్యాంప్ వంటి కమర్షియల్ సక్సెస్ తర్వాత రుద్రాంశ్ సెల్యులాయిడ్ సంస్థ ఈ సినిమాను నిర్మిస్తోంది. సక్సెస్‌ఫుల్ ప్రొడ్యూసర్ బొమ్మక్ శివ నిర్మాణంలో తెరకెక్కుతున్న ఈ చిత్రానికి సురేష్ తేజ్ దర్శకత్వం వహిస్తున్నారు. విభిన్నమైన కథతో ఈ సినిమా రూపొందుతున్నట్లు సమాచారం.

తిరువనంతపురంలో రెస్టారెంట్ ఆర్డర్లు తీసుకుంటున్న వెంకటేష్.వి.పి.కి నిర్మాత బొమ్మక్ శివ, దర్శకుడు సురేష్ తేజ్ ఫోన్ చేసి సినిమాలో నటించమని అడిగే వీడియోను సరదాగా రూపొందించారు. మొదట తనకు విలన్ పాత్ర ఇస్తున్నారని భావించిన వెంకటేష్ పెద్దగా ఆసక్తి చూపించలేదు. అయితే హీరోగా ఎంపిక చేస్తున్నామని చెప్పడంతో ఆశ్చర్యానికి గురయ్యారు. అనంతరం కథ విని ఆయన మరింత ఆకట్టుకున్నట్లు తెలుస్తోంది. ఈ మొత్తం పరిణామాన్ని ఫన్‌గా చూపించిన వీడియో ఇప్పుడు ప్రేక్షకులను నవ్విస్తోంది. ‘కింగ్డమ్’లో మురుగన్‌గా మెప్పించిన వెంకటేష్.వి.పి. ఇప్పుడు హీరోగా ఎలాంటి గుర్తింపు తెచ్చుకుంటారనే ఆసక్తి నెలకొంది. రుద్రాంశ్ సెల్యులాయిడ్ సంస్థ నుంచి వస్తున్న ఈ చిత్రం ఆయన కెరీర్‌కు ఎలాంటి మలుపు ఇస్తుందో చూడాలి.