రామ్ చరణ్‌ అన్నతో సినిమా చేయాలని ఉంది: వరుణ్ తేజ్...

మెగా ప్రిన్స్ వరుణ్ తేజ్ తన సోదరుడు, గ్లోబల్ స్టార్ రామ్ చరణ్‌తో కలిసి నటించాలన్న తన కోరికను వెల్లడించారు. ఇటీవల ‘కొరియన్ కనకరాజు’ విజయంతో ఉత్సాహంగా ఉన్న ఆయన.. తన కెరీర్, భవిష్యత్ ప్రాజెక్టులపై ఆసక్తికర విషయాలను పంచుకున్నారు. గత ఐదేళ్లుగా ఆశించిన స్థాయిలో విజయాలు లేక కొంత ఒత్తిడికి గురయ్యానని, అయితే ‘కొరియన్ కనకరాజు’కు ప్రేక్షకుల నుంచి లభించిన ఆదరణతో ఇప్పుడు ఎంతో ఊరటగా ఉందని చెప్పారు. ఒకే జానర్‌కు పరిమితం కావడం తనకు ఇష్టం లేదని, నటుడు ఎలాంటి పాత్రనైనా చేయగలగాలని తాను నమ్ముతానన్నారు. ఓటీటీ ప్రాధాన్యం పెరిగినా.. థియేటర్ ప్రేక్షకులకు స్వచ్ఛమైన వినోదాన్ని అందించడం ఎంతో ముఖ్యమని తెలిపారు.

త్వరలో విడుదల కానున్న స్పోర్ట్స్ డ్రామా ‘బరి’ గురించి మాట్లాడుతూ.. గతంలో ‘గని’లో అనేక అంశాలను కలపడం వల్ల కొంత గందరగోళం ఏర్పడిందని, ‘బరి’ మాత్రం పూర్తి క్రీడా నేపథ్యంతో వాస్తవికంగా ఉంటుందని వరుణ్ తేజ్ చెప్పారు. ఈ కథ ఆలోచన తన సోదరి నిహారిక నుంచి వచ్చిందని తెలిపారు. అలాగే దర్శకుడు కార్తీక్ సుబ్బరాజ్‌తో ఓ రొమాంటిక్ చిత్రానికి అంగీకరించినట్లు వెల్లడించారు. రామ్ చరణ్ తనకు ఎంతో స్ఫూర్తినిస్తారని, ఆయన సినిమాల కోసం చేసే కృషిని దగ్గరగా గమనిస్తుంటానని చెప్పారు. చరణ్ అన్నతో కలిసి ఓ సినిమా చేయాలన్నది తన కోరిక అని వరుణ్ తేజ్ స్పష్టం చేశారు. తాను సినీ పరిశ్రమలోకి దర్శకుడు కావాలనే లక్ష్యంతో అడుగుపెట్టానని, భవిష్యత్తులో దర్శకత్వం వైపు తప్పకుండా అడుగులు వేస్తానన్నారు.