ఆస్కార్ ఎంట్రీ లిస్ట్‌లో హోంబాలే ఫిల్మ్స్

భారతీయ సినీ పరిశ్రమలో ప్రతిష్టాత్మక నిర్మాణ సంస్థగా నిలిచిన హోంబాలే ఫిల్మ్స్ అంతర్జాతీయ వేదికపై మరో ఘనతను సాధించింది. 2025 లో విడుదలైన మహావతార్ నరసింహ మరియు కాంతారా: చాప్టర్ 1 చిత్రాలు ఆస్కార్ జనరల్ ఎంట్రీ లిస్ట్‌లో అధికారికంగా చోటు దక్కించుకోవడంతో ఇది భారతీయ సినిమాకు గర్వకారణంగా మారింది. రిషబ్ శెట్టి దర్శకత్వంలో విజయ్ కిరగందూర్ నిర్మించిన కాంతారా: చాప్టర్ 1, అలాగే అశ్విన్ కుమార్ దర్శకత్వంలో హోంబాలే ఫిల్మ్స్ సమర్పించిన మహావతార్ నరసింహ చిత్రాలు కథన బలం, సాంస్కృతిక లోతు, సాంకేతిక ప్రతిభతో విస్తృత ప్రశంసలు అందుకున్నాయి.

జనరల్ ఎంట్రీ లిస్ట్‌లో చేరడంతో ఈ రెండు చిత్రాలు బెస్ట్ యాక్టర్, బెస్ట్ యాక్ట్రెస్, బెస్ట్ డైరెక్టర్, బెస్ట్ ప్రొడ్యూసర్, బెస్ట్ ఒరిజినల్ స్క్రీన్‌ప్లే, బెస్ట్ ప్రొడక్షన్ డిజైన్, బెస్ట్ సినిమాటోగ్రఫీ వంటి ప్రధాన ఆస్కార్ విభాగాల్లో పరిశీలనకు అర్హత పొందాయి. ఈ ఏడాది ఆస్కార్ జనరల్ ఎంట్రీ లిస్ట్‌లో చోటు దక్కిన ఐదు భారతీయ చిత్రాల్లో రెండూ హోంబాలే ఫిల్మ్స్‌వే కావడం విశేషం. ఇది భారతీయ సినిమాను ప్రపంచ స్థాయికి తీసుకెళ్లే దిశగా హోంబాలే ఫిల్మ్స్ చేస్తున్న నిరంతర కృషికి నిదర్శనంగా నిలుస్తోంది.