హన్సిక చేతికి మరో బంపర్ ఛాన్స్!

ఒకప్పుడు తన అందం, నటనతో దక్షిణాది ప్రేక్షకులను అలరించిన ప్రముఖ నటి హన్సిక మోత్వాని ప్రస్తుతం తన రెండో ఇన్నింగ్స్‌లో వరుస అవకాశాలతో బిజీగా ఉన్నారు. తెలుగు, తమిళం, హిందీ, కన్నడ భాషల్లో పలు చిత్రాల్లో నటిస్తున్నారు. ప్రస్తుతం ‘గాంధారి’, ‘మ్యాన్‌’, ‘పారడాక్స్‌’, ‘లవ్‌ ఎఫైర్‌’ చిత్రాల్లో నటిస్తున్న ఆమె తాజాగా మరో తెలుగు సినిమాకు ఓకే చెప్పారు. నారా రోహిత్‌ హీరోగా తెరకెక్కుతున్న సైకలాజికల్‌ హారర్‌ థ్రిల్లర్‌ ‘కపాలి’లో హన్సిక కథానాయికగా ఎంపికయ్యారు.

హన్సిక పుట్టినరోజు సందర్భంగా ‘కపాలి’ చిత్రబృందం ప్రత్యేక పోస్టర్‌ను విడుదల చేసి ఆమెకు శుభాకాంక్షలు తెలిపింది. హన్సిక రాకతో ‘కపాలి’ కథలో కొత్త అధ్యాయం ప్రారంభమవుతుందని చిత్రబృందం పేర్కొంది. ఆమె ప్రతిభ, నటనతో మరిన్ని విజయాలు సాధించాలని ఆకాంక్షించింది. ఈ చిత్రానికి రామ్‌ గన్ని దర్శకత్వం వహిస్తుండగా, విజయ్‌ కృష్ణ లింగమనేని సమర్పణలో సప్త అశ్వ మీడియా వర్క్స్‌ పతాకంపై కళ్యాణ్‌ చక్రవర్తి నిర్మిస్తున్నారు.