తెలంగాణ - ఈశాన్య ఫిల్మ్ ఫెస్టివల్ ను లాంఛ్ చేసిన గవర్నర్ జిష్ణు దేవ్ వర్మ!

తెలంగాణ–ఈశాన్య కనెక్ట్ 2-డే ఫిల్మ్ ఫెస్టివల్ హైదరాబాద్‌లోని ప్రసాద్ ఐమ్యాక్స్ లో గవర్నర్ శ్రీ జిష్ణు దేవ్ వర్మ ఆధ్వర్యంలో ప్రారంభమైంది. ఈ కార్యక్రమం సంస్కృతిక వేడుకలకు మాత్రమే పరిమితం కాకుండా, ఆరోగ్యం, ఐటీ, మహిళా సాధికారత, సృజనాత్మక కళలు, యువజన భాగస్వామ్యం వంటి రంగాల్లో తెలంగాణ–ఈశాన్య రాష్ట్రాల మధ్య సహకారం బలోపేతం చేయడం ప్రధాన లక్ష్యమని గవర్నర్ పేర్కొన్నారు. రెండు ప్రాంతాల వైవిధ్యం, చైతన్యం పరస్పరాభివృద్ధికి అనేక అవకాశాలను సృష్టిస్తాయని ఆయన తెలిపారు.

సినిమాకు ఉన్న ప్రభావం గురించి మాట్లాడుతూ, భాషలు దాటే సామర్థ్యం ఉన్న శక్తివంతమైన మాధ్యమమని, ఈశాన్య ప్రాంతాల్లో తెలుగు సినిమాలు విస్తృత ఆదరణ పొందుతున్నాయని గవర్నర్ అన్నారు. ఈశాన్య రాష్ట్రాలలో వేగంగా ఎదుగుతున్న సినిమా పరిశ్రమను గుర్తు చేస్తూ, దర్శకులు, సాంకేతిక నిపుణులు రెండు ప్రాంతాల నుంచి కలిసి పనిచేసే అవకాశాల కోసం ఈ ఫెస్టివల్ విలువైన వేదికగా నిలుస్తుందని పేర్కొన్నారు. అనంతరం ఆయన మీడియా సెంటర్‌ను ప్రారంభించి, యార్వింగ్ చిత్రం స్క్రీనింగ్‌లో పాల్గొన్నారు.

ఫెస్టివల్‌లో త్రిపుర, మణిపూర్, అస్సాం, మేఘాలయ, సిక్కిం, తెలంగాణ రాష్ట్రాల నుండి వచ్చిన పన్నెండు చిత్రాలు ప్రదర్శించబడనున్నాయి. నా బంగారు తల్లి, పొట్టేల్, మల్లేశం వంటి జాతీయ స్థాయి గుర్తింపు పొందిన తెలుగు చిత్రాలు కూడా ప్రత్యేకంగా ప్రదర్శించబడతాయి. ఈ సందర్భంగా ఐ అండ్‌ పీఆర్ కమిషనర్ మరియు TGFDC MD సి.హెచ్. ప్రియాంక ఈ కార్యక్రమ లక్ష్యాలు, దాని విస్తృతిని వివరించారు. రాష్ట్ర మంత్రులు, అధికారులు, సినీ ప్రముఖులు మరియు ఈశాన్య రాష్ట్రాల ప్రతినిధులు కూడా ఈ కార్యక్రమంలో పాల్గొన్నారు.