తొలి వారాంతంలో సత్తా చాటిన శ్రీ విష్ణు సినిమా

‘కింగ్ ఆఫ్ ఎంటర్‌టైన్‌మెంట్’ శ్రీ విష్ణు నటించిన తాజా కామెడీ డ్రామా ‘కామ్రేడ్ కళ్యాణ్‌’ బాక్సాఫీస్ వద్ద తొలి వారాంతంలో మంచి ప్రదర్శన కనబరిచింది. విడుదలైన తొలిరోజు నెమ్మదిగా ప్రారంభమైనప్పటికీ, ప్రేక్షకుల నుంచి వచ్చిన పాజిటివ్ టాక్‌తో సాయంత్రం షోల నుంచి వసూళ్లు పుంజుకున్నాయి. తొలి పనిదినం కూడా సినిమా నిలకడగా రాణించడంతో హిట్ స్థాయికి చేరుకున్నట్లు ట్రేడ్ వర్గాలు పేర్కొంటున్నాయి. ఇప్పటికే బయ్యర్లు సేఫ్ జోన్‌లోకి వచ్చినట్లు సమాచారం. అయితే దసరా సందర్భంగా విడుదలవుతున్న కొత్త సినిమాల మధ్య ఈ చిత్రం ఎంతవరకు నిలదొక్కుకుంటుందన్న దానిపై సూపర్‌హిట్ స్థాయి ఆధారపడి ఉంటుంది. ఇందులో మహిమా నంబియార్ కథానాయికగా నటించారు.

జానకిరామ్ మరెల్ల దర్శకత్వం వహించిన ‘కామ్రేడ్ కళ్యాణ్‌’లో సత్య, రాధిక, సుదర్శన్, షైన్ టామ్ చాకో, ఉపేంద్ర లిమాయే, సాయిచంద్ కీలక పాత్రలు పోషించారు. కోన వెంకట్ సమర్పణలో, స్కంద వాహన మోషన్ పిక్చర్స్ ఎల్‌ఎల్‌పీ బ్యానర్‌పై వెంకట కృష్ణ కర్నాటి, సీతా కర్నాటి ఈ చిత్రాన్ని నిర్మించారు. విజయ్ బుల్గానిన్ సంగీతం అందించారు.