జాకీర్ ఖాన్ కు కౌంటర్ ఇచ్చిన బాలీవుడ్

జాకీర్ ఖాన్ ముంబైలో జరిగిన స్క్రీన్ అవార్డ్స్ కార్యక్రమంలో చేసిన వ్యాఖ్యలు బాలీవుడ్‌లో వివాదానికి దారితీశాయి. ‘ధురంధర్’ సినిమా విజయంపై మాట్లాడుతూ, పరిశ్రమలో కొందరికి అసూయ కలుగుతోందని సూచించేలా ఆయన చేసిన జోక్ పలువురిని అసహనానికి గురి చేసింది. ఈ వ్యాఖ్యలపై అమీషా పటేల్ తీవ్రంగా స్పందిస్తూ, అనవసర నెగిటివిటీని వ్యాప్తి చేయవద్దని సూచించింది. బాలీవుడ్ ఎప్పుడూ విజయవంతమైన సినిమాలను గౌరవిస్తుందని ఆమె స్పష్టం చేసింది.

ఈ విషయంపై సిద్ధార్థ్ ఆనంద్ కూడా స్పందిస్తూ, గత అనేక దశాబ్దాలుగా జుహూ-బాంద్రా ప్రాంతాల వారు ఎన్నో బ్లాక్‌బస్టర్ సినిమాలను అందించారని గుర్తుచేశారు. పరిశ్రమ కృషిని తక్కువ చేసి మాట్లాడడం సరైంది కాదని ఆయన విమర్శించారు. ఇప్పటికే ఇతర వ్యాఖ్యల కారణంగా చర్చల్లో ఉన్న ఈ అవార్డుల వేడుక, ఇప్పుడు జాకీర్ ఖాన్ వ్యాఖ్యలతో మరింత హాట్ టాపిక్‌గా మారింది.