ప్రధాని మోదీ నోట ‘కుచ్ కుచ్‌ హోతా హై’ పాట

ప్రధాని నరేంద్ర మోదీ ఇండోనేసియాలోని జకార్తాలో చేసిన ప్రసంగంలో బాలీవుడ్ ప్రసిద్ధ చిత్రం ‘కుచ్ కుచ్ హోతా హై’ పాటను ప్రస్తావించడం ఆసక్తికరంగా మారింది. ఇండోనేసియాలో భారతీయ సినిమాలకు ఉన్న ఆదరణను గుర్తుచేసిన ఆయన, ఈ పాట అక్కడ కూడా ఎంతో ప్రజాదరణ పొందిందని చెప్పారు. భారత్, ఇండోనేసియా కలిసి పనిచేస్తే ‘కుచ్ కుచ్’ నుంచి ‘బహుత్ కుచ్’ సాధించవచ్చని చమత్కరించారు.

ఈ విషయంపై బాలీవుడ్ దర్శకుడు కరణ్ జోహర్ ఆనందం వ్యక్తం చేశారు. తన దర్శకత్వంలో వచ్చిన ఈ చిత్రాన్ని ప్రధాని ప్రస్తావించడం గౌరవంగా భావిస్తున్నానని తెలిపారు. భాషలతో సంబంధం లేకుండా సినిమాలు ప్రపంచవ్యాప్తంగా ప్రభావం చూపుతాయని, ఈ పాటను రెండు దేశాల సంబంధాల సందర్భంలో ప్రస్తావించినందుకు ధన్యవాదాలు తెలిపారు. 1998లో విడుదలైన ఈ చిత్రం భారీ విజయాన్ని సాధించింది.