‘విశ్వనాథ్ అండ్ సన్స్’ ఖాతాలో మరో అరుదైన రికార్డు!

కోలీవుడ్ స్టార్ హీరో సూర్య, దర్శకుడు వెంకీ అట్లూరి కాంబినేషన్‌లో తెరకెక్కిన ఫ్యామిలీ డ్రామా ‘విశ్వనాథ్ అండ్ సన్స్’ బాక్సాఫీస్ వద్ద దూసుకెళ్తోంది. విడుదలైనప్పటి నుంచి ప్రేక్షకుల నుంచి మంచి స్పందన అందుకుంటున్న ఈ సినిమా ప్రపంచవ్యాప్తంగా భారీ వసూళ్లు సాధిస్తోంది. తాజాగా 25 రోజుల థియేట్రికల్ రన్‌ను పూర్తి చేసుకున్న సందర్భంగా చిత్రబృందం కీలక ప్రకటన చేసింది. కేవలం 25 రోజుల్లోనే ప్రపంచవ్యాప్తంగా రూ.260 కోట్లకు పైగా గ్రాస్ వసూళ్లు సాధించినట్లు అధికారికంగా వెల్లడించింది. దీంతో సూర్య మార్కెట్ స్థాయిని ఈ సినిమా మరోసారి చాటిచెప్పిందని అభిమానులు ఆనందం వ్యక్తం చేస్తున్నారు.

సితార ఎంటర్‌టైన్‌మెంట్స్, ఫార్చ్యూన్ ఫోర్ సినిమాస్ నిర్మించిన ఈ చిత్రంలో మమితా బైజు కథానాయికగా నటించగా, రాధిక శరత్‌కుమార్, రవీనా టాండన్, ప్రకాష్ రాజ్ కీలక పాత్రలు పోషించారు. జి.వి. ప్రకాష్ కుమార్ సంగీతం అందించారు. 25 రోజులు పూర్తయినా పలు ప్రాంతాల్లో థియేటర్లకు ప్రేక్షకులు వస్తుండటంతో సినిమా లాంగ్ రన్‌లో మరిన్ని వసూళ్లు సాధించే అవకాశాలు కనిపిస్తున్నాయని చిత్రబృందం తెలిపింది. ఈ రికార్డు సూర్య అభిమానుల్లో మరింత ఉత్సాహాన్ని నింపింది.