పదిహేడేళ్ల తర్వాత కలిసిన సైఫ్ - అక్షయ్.. హైవాన్‌ టీజర్ వైరల్!

బాలీవుడ్ స్టార్ హీరోలు అక్షయ్‌ కుమార్, సైఫ్‌ అలీఖాన్‌ పదిహేడేళ్ల తర్వాత కలిసి నటించిన చిత్రం ‘హైవాన్‌’. ప్రముఖ దర్శకుడు ప్రియదర్శన్‌ తెరకెక్కించిన ఈ చిత్రంలో బొమన్‌ ఇరానీ, సయామీ ఖేర్, శ్రియ పిల్గాంకర్‌ కీలక పాత్రలు పోషించారు. కేవీఎన్‌ ప్రొడక్షన్స్, తెస్పియన్‌ ఫిలింస్‌ బ్యానర్స్‌పై వెంకట్‌ కె. నారాయణ, శైలజా దేశాయ్‌ ఫెన్‌ నిర్మించారు. సెప్టెంబరు 11న ఈ సినిమా ప్రపంచవ్యాప్తంగా విడుదల కానుంది. తాజాగా మేకర్స్ విడుదల చేసిన టీజర్‌కు మంచి స్పందన లభిస్తోంది. ఇందులో సైఫ్‌ అలీఖాన్‌ దివ్యాంగుడి పాత్రలో కనిపించగా, అక్షయ్‌ కుమార్‌ తీవ్రతతో కూడిన పాత్రలో ఆకట్టుకున్నారు.‘హైవాన్‌’ సరికొత్త థ్రిల్లర్‌గా తెరకెక్కిందని చిత్రబృందం చెబుతోంది. ఈ సినిమాలో అక్షయ్‌ కుమార్‌ తొలిసారి ప్రతినాయక ఛాయలున్న పాత్రలో నటించినట్లు తెలిపింది. ఇప్పటికే విడుదలైన ఫస్ట్‌లుక్‌ పోస్టర్‌కు పాన్‌ ఇండియా స్థాయిలో స్పందన రాగా, తాజాగా వచ్చిన టీజర్‌ అంచనాలను మరింత పెంచింది. హై క్వాలిటీ నిర్మాణ విలువలతో రూపొందిన ఈ చిత్రానికి దివాకర్‌ మణి ఛాయాగ్రహణం అందించారు. ప్రీతమ్‌ చక్రవర్తి సంగీతం సమకూర్చారు.