‘సైయారా’ తర్వాత అహాన్ పాండే మరో క్రేజీ ప్రాజెక్ట్

వరుసగా భారీ ప్రాజెక్టులతో ప్రేక్షకులను ఆకట్టుకుంటున్న ప్రముఖ నిర్మాణ సంస్థ యష్ రాజ్ ఫిల్మ్స్ (వైఆర్‌ఎఫ్) మరో కొత్త సినిమాను ప్రకటించింది. యంగ్ హీరో అహాన్ పాండే, శార్వరి జంటగా నటించనున్న ఈ రొమాంటిక్ యాక్షన్ ఎంటర్‌టైనర్‌కు ‘బేపర్వా’ అనే టైటిల్‌ను ఖరారు చేశారు. ఆదిత్య చోప్రా నిర్మిస్తున్న ఈ చిత్రాన్ని 2027 మార్చి 26న ప్రపంచవ్యాప్తంగా థియేటర్లలో విడుదల చేయనున్నట్లు మేకర్స్ వెల్లడించారు. ఈ సందర్భంగా ఆకట్టుకునే పోస్టర్‌ను విడుదల చేశారు. ‘సైయారా’ చిత్రంతో ప్రేక్షకుల దృష్టిని ఆకర్షించి, బ్లాక్‌బస్టర్ విజయాన్ని అందుకున్న అహాన్ పాండేకు వైఆర్‌ఎఫ్ బ్యానర్‌లో ఇది రెండో సినిమా కావడం విశేషం.

అహాన్ పాండే, శార్వరి తొలిసారి జంటగా నటిస్తున్న చిత్రం కూడా ఇదే. వరుస అవకాశాలతో దూసుకెళ్తున్న శార్వరికి ఈ ప్రాజెక్ట్ మరో కీలక చిత్రంగా నిలవనుంది. గతంలో ‘మేరే బ్రదర్ కి దుల్హన్’, ‘గుండే’, ‘సుల్తాన్’, ‘టైగర్ జిందా హై’ వంటి చిత్రాలతో వైఆర్‌ఎఫ్‌తో విజయవంతంగా పనిచేసిన దర్శకుడు అలీ అబ్బాస్ జాఫర్ చాలా కాలం తర్వాత ఈ నిర్మాణ సంస్థతో మళ్లీ చేతులు కలిపారు. ఆయన దర్శకత్వంలో రూపొందుతున్న ఈ రొమాంటిక్ యాక్షన్ ఎంటర్‌టైనర్‌పై ఇప్పటికే ప్రేక్షకుల్లో ఆసక్తి పెరుగుతోంది.