మహారాష్ట్ర సీఎం ఫడణవీస్‌తో సీఎం రేవంత్‌రెడ్డి బృందం భేటీ

తుమ్మిడిహెట్టి వద్ద ఆనకట్ట నిర్మాణానికి సంబంధించి తెలంగాణ, మహారాష్ట్ర ప్రభుత్వాల మధ్య కీలక చర్చలు ప్రారంభమయ్యాయి. ముంబయిలోని సహ్యాద్రి స్టేట్‌ గెస్ట్‌హౌస్‌లో మహారాష్ట్ర ముఖ్యమంత్రి దేవేంద్ర ఫడణవీస్‌తో తెలంగాణ ముఖ్యమంత్రి రేవంత్‌రెడ్డి నేతృత్వంలోని బృందం సమావేశమైంది. ఈ భేటీలో తెలంగాణ నీటిపారుదల శాఖ మంత్రి ఉత్తమ్‌కుమార్‌రెడ్డి, ప్రభుత్వ సలహాదారు రామకృష్ణారావు, ప్రభుత్వ ప్రధాన కార్యదర్శి సంజయ్‌ జాజు, ఉన్నతాధికారులు, ఇంజినీర్లు పాల్గొన్నారు. తుమ్మిడిహెట్టి వద్ద 152 మీటర్ల ఎత్తుతో బ్యారేజీ నిర్మాణానికి మహారాష్ట్ర అంగీకరించాలని తెలంగాణ బృందం కోరింది. ఈ సందర్భంగా మంత్రి ఉత్తమ్‌కుమార్‌రెడ్డి పవర్‌పాయింట్‌ ప్రజెంటేషన్‌ ద్వారా ప్రాజెక్టు ప్రాధాన్యాన్ని, ప్రతిపాదిత నిర్మాణం అవసరాన్ని వివరించారు. గతంలో 148 మీటర్ల ఎత్తుతో ఆనకట్ట నిర్మాణానికి ఒప్పందం కుదిరినా, ఆ ఎత్తుతో తెలంగాణకు అవసరమైన స్థాయిలో నీటిని వినియోగించుకోవడం సాధ్యం కాదని పేర్కొన్నారు.

ప్రాణహిత నది జలాలు ఉమ్మడి ఆదిలాబాద్‌ జిల్లాతో పాటు తెలంగాణ రాష్ట్రానికి ఎంతో కీలకమని, ప్రాజెక్టు నిర్మాణానికి మహారాష్ట్ర ప్రభుత్వం సహకరించాలని రాష్ట్ర బృందం విజ్ఞప్తి చేసింది. 152 మీటర్ల ఎత్తుతో బ్యారేజీ నిర్మించినా మహారాష్ట్రలో ముంపు సమస్య పరిమితంగానే ఉంటుందని, సుమారు 2,300 ఎకరాల భూమి ముంపునకు గురయ్యే అవకాశం ఉందని తెలంగాణ అధికారులు వివరించారు. నిర్మాణ ఎత్తును 150 మీటర్లకు తగ్గిస్తే ముంపు విస్తీర్ణం 1,000 ఎకరాల్లోపే ఉంటుందని తెలిపారు. వ్యాప్కోస్‌, సీడబ్ల్యూపీఆర్‌ఎస్‌ అధ్యయనాలు, ప్రీ-ఫీజిబిలిటీ నివేదికతో పాటు ఇతర సాంకేతిక అంశాలను మహారాష్ట్ర ముఖ్యమంత్రి దృష్టికి తీసుకెళ్లారు. తుమ్మిడిహెట్టి వద్ద 152 మీటర్ల ఎత్తుతో బ్యారేజీ నిర్మాణానికి అంగీకరించాలని సీఎం రేవంత్‌రెడ్డి బృందం కోరింది. ఈ అధికారిక చర్చలకు ముందు ఇరు రాష్ట్రాల ముఖ్యమంత్రులు విడిగా సమావేశమయ్యారు.