ఎన్టీఆర్ హెల్త్ యూనివర్సిటీ నుంచి నోబెల్ గ్రహీతలు రావాలి - ఉపరాష్ట్రపతి

విజయవాడలో డాక్టర్ ఎన్టీఆర్ ఆరోగ్య విజ్ఞాన విశ్వవిద్యాలయం 40వ వార్షికోత్సవ వేడుకలు ఘనంగా జరిగాయి. ఈ కార్యక్రమానికి భారత ఉపరాష్ట్రపతి సీపీ రాధాకృష్ణన్ హాజరయ్యారు. ఈ సందర్భంగా ఆయన స్వర్గీయ ఎన్టీ రామారావు విద్య, వైద్యం, ఆరోగ్యం, సంక్షేమం, సాంస్కృతిక రంగాలు, తెలుగు భాషాభివృద్ధికి చేసిన సేవలను కొనియాడారు. దేశంలో తొలి వైద్య విశ్వవిద్యాలయాన్ని స్థాపించడంలో ఎన్టీఆర్ చూపిన దూరదృష్టిని ప్రశంసించారు. అలాగే, ‘తెలుగు గంగ’ ప్రాజెక్టు ద్వారా చెన్నైకి తాగునీరు అందించేందుకు ఆయన చేసిన కృషిని గుర్తుచేశారు. ప్రధాని నరేంద్ర మోదీ నాయకత్వంలో ‘వికసిత్ భారత్ 2047’ లక్ష్యానికి అనుగుణంగా గత 12 ఏళ్లలో దేశవ్యాప్తంగా వైద్య కళాశాలలు, వైద్య విద్య సీట్ల సంఖ్య గణనీయంగా పెరిగిందని ఉపరాష్ట్రపతి పేర్కొన్నారు.

ఎన్టీఆర్ ఆరోగ్య విశ్వవిద్యాలయం నుంచి భవిష్యత్తులో నోబెల్ బహుమతి గ్రహీతలు రావాలని ఉపరాష్ట్రపతి ఆకాంక్షించారు. విద్యార్థులు, పరిశోధకులు అంతర్జాతీయ స్థాయిలో గుర్తింపు పొందేలా అధునాతన పరిశోధనలకు ప్రాధాన్యం ఇవ్వాలని సూచించారు. క్యాన్సర్ వంటి ప్రాణాంతక వ్యాధులకు కొత్త పరిష్కారాలు కనుగొనే దిశగా కృషి చేయాలని పిలుపునిచ్చారు. వైద్య రంగంలో కృత్రిమ మేధ (AI), డిజిటల్ హెల్త్ సాంకేతికతల ప్రాధాన్యం పెరుగుతున్నప్పటికీ, వైద్యులు రోగుల పట్ల మానవీయ స్పర్శ, కరుణ, ఆప్యాయతను ఎప్పటికీ మరవకూడదని స్పష్టం చేశారు. మాదకద్రవ్యాల వినియోగాన్ని అరికట్టేందుకు వైద్యులు, యువత ముందుకు రావాలని, వాటి దుష్ప్రభావాలపై సమాజంలో విస్తృత అవగాహన కల్పించాలని కోరారు.