వైద్య విద్యారంగంలో ఎన్టీఆర్‌ సేవలు చిరస్మరణీయం.. ఉప రాష్ట్రపతి సీపీ రాధాకృష్ణన్‌ ప్రశంసలు

వైద్య విద్యారంగంలో ఉమ్మడి ఆంధ్రప్రదేశ్‌ మాజీ ముఖ్యమంత్రి ఎన్టీఆర్‌ చేసిన సేవలు చిరస్మరణీయమని ఉప రాష్ట్రపతి సీపీ రాధాకృష్ణన్‌ అన్నారు. డాక్టర్‌ ఎన్టీఆర్‌ ఆరోగ్య విశ్వవిద్యాలయం రూబీ జూబ్లీ వేడుకలకు ఆయన ముఖ్య అతిథిగా హాజరయ్యారు. వైద్య విశ్వవిద్యాలయ స్థాపనలో ఎన్టీఆర్‌ చూపిన దూరదృష్టి ప్రశంసనీయమని, దేశంలోనే తొలి వైద్య విశ్వవిద్యాలయాన్ని ఏర్పాటు చేయడం ద్వారా ఆయన చరిత్రాత్మక నిర్ణయం తీసుకున్నారని కొనియాడారు. వికసిత్‌ భారత్‌–2047 లక్ష్యానికి అనుగుణంగా ఉన్నత విద్య, వైద్య విద్య విస్తరణకు ప్రాధాన్యం ఇవ్వాలని పేర్కొన్నారు. ప్రధాని నరేంద్ర మోదీ నాయకత్వంలో గత 12 ఏళ్లలో దేశవ్యాప్తంగా వైద్య కళాశాలలు, ఎంబీబీఎస్‌, పీజీ వైద్య విద్య సీట్ల సంఖ్య గణనీయంగా పెరిగిందని తెలిపారు. ఒకప్పుడు 21 వేలుగా ఉన్న ఎంబీబీఎస్‌ సీట్లు ప్రస్తుతం 1.20 లక్షలకు చేరాయని వివరించారు.

వైద్య విద్యతో పాటు అధునాతన పరిశోధనలపైనా దృష్టి సారించాలని ఉప రాష్ట్రపతి సూచించారు. క్యాన్సర్‌ వంటి ప్రాణాంతక వ్యాధులకు పరిష్కారాలు కనుగొనే దిశగా పరిశోధనలు జరగాలని, ఎన్టీఆర్‌ ఆరోగ్య విశ్వవిద్యాలయం నుంచి నోబెల్‌ బహుమతి గ్రహీతలు రావాలని ఆకాంక్షించారు. వైద్యరంగంలో కృత్రిమ మేధ (ఏఐ), డిజిటల్‌ హెల్త్‌ ప్రాధాన్యం పెరుగుతున్న నేపథ్యంలో విద్యార్థులు అంతర్జాతీయ స్థాయిలో గుర్తింపు సాధించేలా కృషి చేయాలన్నారు. వైద్యులు రోగుల పట్ల మానవత్వం, ఆప్యాయతతో వ్యవహరించాలని, మాదకద్రవ్యాల దుష్ప్రభావాలపై ప్రజల్లో అవగాహన కల్పించేందుకు వైద్యులు, యువత ముందుకు రావాలని పిలుపునిచ్చారు. పుస్తక జ్ఞానంతో పాటు కమ్యూనికేషన్‌, టీమ్‌వర్క్‌ నైపుణ్యాలు కూడా విద్యార్థులకు అవసరమని పేర్కొంటూ, ఆంధ్రప్రదేశ్‌లో ఆరోగ్య సంరక్షణ వ్యవస్థను బలోపేతం చేయడంలో ఎన్టీఆర్‌ ఆరోగ్య విశ్వవిద్యాలయం కీలక పాత్ర పోషించాలని ఆకాంక్షించారు.