రోహిత్ శర్మ ఫిట్‌నెస్‌పై మాజీ కోచ్ సోహమ్ దేశాయ్ కీలక వ్యాఖ్యలు

టీమ్‌ఇండియా మాజీ కెప్టెన్ రోహిత్ శర్మ 39 ఏళ్ల వయసులోనూ మైదానంలో చురుగ్గా కనిపిస్తున్నాడు. గతంతో పోలిస్తే మరింత స్లిమ్‌గా మారడంతో, అతడు ఇటీవలే ఫిట్‌నెస్‌పై ప్రత్యేక దృష్టి పెట్టాడనే అభిప్రాయాలు వ్యక్తమయ్యాయి. అయితే, అందులో వాస్తవం లేదని భారత జట్టు మాజీ కండీషనింగ్, స్ట్రెంగ్త్ కోచ్ సోహమ్ దేశాయ్ స్పష్టం చేశారు. 2017లో తుంటికి తీవ్రమైన గాయం కావడంతో రోహిత్ శస్త్రచికిత్సలు చేయించుకున్నాడని, అప్పటి నుంచి తన శారీరక దృఢత్వాన్ని కాపాడుకోవడానికి వారానికి కనీసం రెండుసార్లు స్ట్రెంగ్త్ ట్రైనింగ్ చేస్తున్నాడని వెల్లడించారు. ఇంతకాలం జట్టులో కొనసాగుతూ పరుగులు సాధించడం, ఐపీఎల్‌లో జట్టుకు నాయకత్వం వహించడం అతడి కష్టానికి నిదర్శనమని పేర్కొన్నారు.

రోహిత్ శర్మ, విరాట్ కోహ్లీ ఫిట్‌నెస్ శిక్షణలోనూ తేడా ఉందని సోహమ్ దేశాయ్ వివరించారు. రోహిత్ ప్రధానంగా స్ట్రెంగ్త్ ఆధారిత వ్యాయామాలు చేస్తాడని, విరాట్ కోహ్లీ శిక్షణలో బరువులు ఎత్తడం ఎక్కువగా ఉంటుందని చెప్పారు. తుంటి గాయం కారణంగా రోహిత్ కొన్ని రకాల బరువుల శిక్షణకు దూరంగా ఉండాల్సి వస్తుందని తెలిపారు. ప్రస్తుతం వన్డే క్రికెట్‌కే పరిమితమైన రోహిత్, వచ్చే ఏడాది జరగనున్న వన్డే ప్రపంచకప్‌లో ఆడటాన్ని లక్ష్యంగా పెట్టుకున్నాడు.