వైద్య విద్యారంగంలో ఎన్టీఆర్ సేవలు చిరస్మరణీయం: ఉపరాష్ట్రపతి సీపీ రాధాకృష్ణన్

డాక్టర్ ఎన్టీఆర్ ఆరోగ్య విశ్వవిద్యాలయం రూబీ జూబ్లీ వేడుకల్లో ఉపరాష్ట్రపతి సీపీ రాధాకృష్ణన్ ముఖ్య అతిథిగా పాల్గొన్నారు. ఈ సందర్భంగా ఆయన మాట్లాడుతూ, వైద్య విద్యారంగంలో మాజీ ముఖ్యమంత్రి ఎన్టీఆర్ చేసిన సేవలు చిరస్మరణీయమని కొనియాడారు. వైద్య విశ్వవిద్యాలయ స్థాపనలో ఎన్టీఆర్ దూరదృష్టి కీలక పాత్ర పోషించిందని, అది వైద్య విద్యారంగంలో చరిత్రాత్మక నిర్ణయమని పేర్కొన్నారు. వికసిత్ భారత్–2047 లక్ష్యానికి అనుగుణంగా దేశంలో వైద్య విద్యను మరింత విస్తరించాల్సిన అవసరం ఉందన్నారు. ప్రధాని నరేంద్ర మోదీ నాయకత్వంలో గత 12 ఏళ్లలో వైద్య కళాశాలలు, ఎంబీబీఎస్‌, పీజీ వైద్య విద్య సీట్లు గణనీయంగా పెరిగాయని తెలిపారు. ఎంబీబీఎస్‌ సీట్ల సంఖ్య 21 వేల నుంచి 1.20 లక్షలకు చేరిందని వివరించారు.

వైద్య విద్యతో పాటు అధునాతన పరిశోధనలకు ప్రాధాన్యం ఇవ్వాలని ఉపరాష్ట్రపతి సూచించారు. క్యాన్సర్‌ వంటి ప్రాణాంతక వ్యాధులకు పరిష్కారాలను కనుగొనే దిశగా విద్యార్థులు కృషి చేయాలని, ఎన్టీఆర్‌ వర్సిటీ నుంచి నోబెల్‌ బహుమతి గ్రహీతలు రావాలని ఆకాంక్షించారు. వైద్యరంగంలో కృత్రిమ మేధ (ఏఐ), డిజిటల్‌ హెల్త్‌ ప్రాధాన్యం పెరుగుతున్న నేపథ్యంలో విద్యార్థులు అంతర్జాతీయ స్థాయిలో గుర్తింపు సాధించేలా పరిశోధనలు చేయాలన్నారు. వైద్యులు రోగుల పట్ల మానవత్వం, ఆప్యాయతతో వ్యవహరించాలని, డ్రగ్స్‌ దుష్ప్రభావాలపై ప్రజల్లో అవగాహన కల్పించాలని పిలుపునిచ్చారు. పుస్తక జ్ఞానంతో పాటు కమ్యూనికేషన్‌, టీమ్‌వర్క్‌ నైపుణ్యాలను పెంపొందించుకోవాలని, ఆంధ్రప్రదేశ్‌లో ఆరోగ్య సంరక్షణ వ్యవస్థను బలోపేతం చేయడంలో ఎన్టీఆర్‌ ఆరోగ్య విశ్వవిద్యాలయం కీలక పాత్ర పోషించాలని సూచించారు.