బాలయ్య, మంచు మనోజ్ మధ్య మాటల యుద్ధం?

నందమూరి బాలకృష్ణ సినిమాల్లో భారీ యాక్షన్ సన్నివేశాలు, పవర్‌ఫుల్ డైలాగులకు ప్రత్యేక గుర్తింపు ఉంది. అయితే ఆయన నటిస్తున్న తాజా చిత్రం ‘దాదా’లో సరికొత్త ప్రయోగం ఉండబోతున్నట్లు సినీ వర్గాల్లో ప్రచారం జరుగుతోంది. ఈ సినిమాలో మంచు మనోజ్ ప్రతినాయక ఛాయలున్న పాత్రలో కనిపించనున్నట్లు సమాచారం. బాలకృష్ణ, మనోజ్ మధ్య వచ్చే ముఖాముఖి సన్నివేశం ప్రత్యేక ఆకర్షణగా నిలవనుందని టాక్. ఆసక్తికరమైన విషయం ఏమిటంటే.. వీరిద్దరి మధ్య పోరు రక్తపాతం లేకుండా కేవలం మాటలతోనే సాగనుందట.

బాలకృష్ణ తనదైన గంభీరమైన సంభాషణలతో ఆకట్టుకోనుండగా, మంచు మనోజ్ కూడా ధీటైన సమాధానాలతో ఎదుర్కోనున్నట్లు తెలుస్తోంది. దర్శకుడు గోపీచంద్ మలినేని ఈ సన్నివేశాలను ఉత్కంఠభరితంగా తెరకెక్కిస్తున్నారని ప్రచారం జరుగుతోంది. ‘వీరసింహారెడ్డి’ తర్వాత బాలకృష్ణ, గోపీచంద్ మలినేని కలయికలో వస్తున్న ఈ చిత్రాన్ని 1980ల నాటి ముంబై నేపథ్యంలో గ్యాంగ్‌స్టర్ కథాంశంతో రూపొందిస్తున్నట్లు సమాచారం. ఇందులో బాలకృష్ణ రెండు విభిన్న పాత్రల్లో కనిపించనున్నారని, డిసెంబర్ 24న క్రిస్మస్ కానుకగా విడుదల చేయాలని చిత్రబృందం భావిస్తున్నట్లు టాక్.