అమెరికా మధ్యంతర ఎన్నికల్లో ట్రంప్‌కు బిగ్ షాక్..

2026 అమెరికా మధ్యంతర ఎన్నికల్లో డెమోక్రటిక్ పార్టీ కీలక విజయం సాధించింది. సెనేట్‌పై నియంత్రణను కైవసం చేసుకుని అధ్యక్షుడు డొనాల్డ్ ట్రంప్, రిపబ్లికన్ పార్టీకి గట్టి ఎదురుదెబ్బ ఇచ్చింది. ముఖ్యంగా రిపబ్లికన్లకు పట్టున్న టెక్సాస్, కాన్సాస్, ఓహియో, సౌత్ కరోలినా వంటి రాష్ట్రాల్లో డెమోక్రాట్లు కీలక సెనేట్ స్థానాలను గెలుచుకున్నారు. మెజారిటీకి అవసరమైన స్థానాలను సాధించడంతో సెనేట్‌లో ఆధిపత్యం సంపాదించారు. ఈ ఫలితాలతో ట్రంప్ పదవీకాలం మిగిలిన సమయంలో చట్టాల రూపకల్పన, ప్రభుత్వ నిర్ణయాలపై డెమోక్రాట్ల ప్రభావం పెరిగే అవకాశం ఉంది.

ఈ ఎన్నికల్లో కొన్ని విజయాలు చారిత్రకంగా నిలిచాయి. టెక్సాస్‌లో డెమోక్రటిక్ అభ్యర్థి జేమ్స్ తలారికో, రిపబ్లికన్ అభ్యర్థి కెన్ పాక్స్టన్‌పై విజయం సాధించారు. 1988 తర్వాత టెక్సాస్ సెనేట్ స్థానాన్ని డెమోక్రాట్ గెలుచుకోవడం ఇదే తొలిసారి. కాన్సాస్‌లో ఆడమ్ హామిల్టన్, ప్రస్తుత రిపబ్లికన్ సెనేటర్ రోజర్ మార్షల్‌పై గెలిచారు. 1932 తర్వాత ఆ రాష్ట్రంలో డెమోక్రాట్లకు ఇది తొలి సెనేట్ విజయం. ఓహియోలో షెరాడ్ బ్రౌన్, సౌత్ కరోలినాలో అన్నీ ఆండ్రూస్ విజయం సాధించారు. మరోవైపు ప్రతినిధుల సభలోనూ డెమోక్రాట్లు గణనీయమైన ఆధిక్యం సాధించే దిశగా ఉన్నారు. అయితే కొన్ని స్థానాల్లో ఓట్ల లెక్కింపు ఇంకా కొనసాగుతున్నందున ఆ సభపై పూర్తి నియంత్రణకు సంబంధించిన తుది ఫలితాలు స్పష్టమైన తర్వాతే నిర్ధారించాల్సి ఉంటుంది.