ఆరోగ్యం
శీతాకాలంలో రక్తపోటు (BP) పెరిగే ప్రమాదం ఎక్కువగా ఉంటుంది. చలికాలంలో రక్తనాళాలు సంకుచించడం వల్ల గుండె రక్తాన్ని పంపడానికి అదనపు ఒత్తిడిని ఉపయోగించాల్సి వస్తుంది. ముఖ్యంగా వృద్ధులు మరియు ఇప్పటికే బీపీ సమస్య ఉన్నవారిలో గుండె జబ్బులు, స్ట్రోక్ వంటి సమస్యలు వచ్చే అవకాశాలు పెరుగుతాయి. అందువల్ల, చలికాలంలో ఈ సూచనలు తప్పనిసరిగా పాటించాలని నిపుణులు సూచిస్తున్నారు.
శీతాకాలంలో వెచ్చని దుస్తులు ధరించడం రక్తనాళాల సంకోచాన్ని తగ్గించి, రక్తప్రసరణను సక్రమంగా ఉంచుతుంది. దీంతో బీపీ నియంత్రణలో ఉండేందుకు సహాయపడుతుంది.
బయట చలిగా ఉండటం వల్ల వ్యాయామం చేయడం కష్టమవుతుంది. అలాంటి పరిస్థితుల్లో ఇంట్లోనే నడక, స్ట్రెచింగ్ చేయడం రక్తప్రసరణను మెరుగుపరచి, రక్తపోటును స్థిరంగా ఉంచుతుంది.
శీతాకాలంలో దాహం ఎక్కువగా వేయకపోయినా శరీరం నిర్జలీకరణానికి గురయ్యే అవకాశం ఉంటుంది. నిర్జలీకరణం రక్తపోటును ప్రభావితం చేస్తుంది. కాబట్టి రోజంతా తగినంత నీరు తాగాలని నిపుణులు సూచిస్తున్నారు.
చలికాలంలో ప్రాసెస్ చేసిన ఆహారం లేదా బయట ఆహారం తినాలనే కోరిక ఎక్కువగా ఉంటుంది. అయితే ఇవి రక్తపోటుపై ప్రతికూల ప్రభావం చూపుతాయి. తక్కువ ఉప్పుతో ఇంట్లో వండిన ఆరోగ్యకరమైన ఆహారం తీసుకోవడం మంచిది.
శీతాకాలంలో బీపీ మార్పులు సాధారణం. కాబట్టి ఇంట్లో డిజిటల్ బీపీ మానిటర్తో రక్తపోటును క్రమం తప్పకుండా తనిఖీ చేయాలి. రీడింగ్లు నిరంతరం ఎక్కువగా వస్తే వెంటనే వైద్యుడిని సంప్రదించాలి.
కామెంట్స్ (1)
ఉపయోగకరమైన ఆరోగ్య సూచనలు