చరణ్, సుకుమార్ సినిమాపై రీమేక్ పుకార్లేంటి?

మెగా పవర్ స్టార్ రాంచరణ్, దర్శకుడు సుకుమార్ కలయికలో మరో సినిమా ప్రారంభం కావడంతో అభిమానుల్లో భారీ అంచనాలు నెలకొన్నాయి. వీరిద్దరి కాంబినేషన్‌లో గతంలో వచ్చిన రంగస్థలం సినిమాకు మంచి ఆదరణ లభించడంతో కొత్త ప్రాజెక్టుపై ఆసక్తి మరింత పెరిగింది. అయితే ఈసారి ఎలాంటి కథను ఎంచుకున్నారనే విషయాన్ని చరణ్ కానీ, సుకుమార్ కానీ వెల్లడించలేదు. షూటింగ్ ముహూర్తం షాట్‌తో ప్రారంభమైనప్పటికీ, కథకు సంబంధించిన వివరాలు మాత్రం బయటకు రాలేదు. ఇదిలా ఉంటే, సినిమా తొలి ప్రచార చిత్రాన్ని చూసిన కొందరు నెటిజన్లు ఇది గుజరాతీ హిట్ సినిమా ‘లాలో.. కృష్ణ సదా సహాయతే’కు రీమేక్ కావచ్చని అనుమానాలు వ్యక్తం చేస్తున్నారు.

ఆ చిత్రంలో కృష్ణుడి పాత్ర కథలో కీలకంగా నిలవగా, రాంచరణ్ కూడా కొత్త సినిమాలో అలాంటి పాత్రలో కనిపించబోతున్నారనే ప్రచారం జరుగుతోంది. గతంలోనూ ఈ రీమేక్ గురించి వార్తలు వచ్చిన నేపథ్యంలో తాజా పోస్టర్ చర్చకు మరింత బలం చేకూర్చింది. కేవలం రూ. 50 లక్షల బడ్జెట్‌తో రూపొందిన ‘లాలో’ బాక్సాఫీస్ వద్ద రూ. 122 కోట్లకు పైగా వసూలు చేసి సంచలనం సృష్టించింది. రూ. 100 కోట్ల వసూళ్లు సాధించిన తొలి గుజరాతీ చిత్రంగా కూడా రికార్డు సొంతం చేసుకుంది. అయితే రాంచరణ్, సుకుమార్ సినిమా నిజంగానే ఈ కథ ఆధారంగా రూపొందుతోందా? లేక పూర్తిగా కొత్త కథనా? అనేది తెలియాలంటే చిత్ర బృందం స్పందించే వరకు ఎదురుచూడాల్సిందే.