‘వృషకర్మ’ అప్డేట్: నాగచైతన్య యాక్షన్ థ్రిల్లర్ నుంచి త్వరలో ఫస్ట్ గ్లింప్స్!

నాగచైతన్య హీరోగా నటిస్తున్న తాజా చిత్రం వృషకర్మ చిత్రీకరణ వేగంగా కొనసాగుతోంది. విరూపాక్ష ఫేమ్ కార్తీక్ దండు దర్శకత్వం వహిస్తున్న ఈ సినిమాను సుకుమార్ రైటింగ్స్, శ్రీ వెంకటేశ్వర సినీ చిత్ర సంస్థలు సంయుక్తంగా నిర్మిస్తున్నాయి. మీనాక్షి చౌదరి కథానాయికగా నటిస్తోంది. ప్రస్తుతం రామోజీ ఫిల్మ్ సిటీలో షూటింగ్ జరుగుతుండగా, సినిమా నిర్మాణం చివరి దశకు చేరుకుంది. ఈ నేపథ్యంలో సినిమా నుంచి ప్రత్యేక గ్లింప్స్ విడుదలకు చిత్రబృందం సన్నాహాలు ప్రారంభించింది.

మార్చి తొలి వారంలో ఈ గ్లింప్స్ విడుదలయ్యే అవకాశముందని సమాచారం. ఈ వీడియో ద్వారా సినిమా కథా ప్రపంచం, భారీ స్థాయి విజువల్ స్కేల్‌ను ప్రేక్షకులకు పరిచయం చేయనున్నట్లు తెలుస్తోంది. అదే సమయంలో విడుదల తేదీపై కూడా స్పష్టత వచ్చే అవకాశం ఉంది. ఈ యాక్షన్ థ్రిల్లర్‌లో నాగచైతన్య అర్జున్ అనే నిధి అన్వేషకుడిగా కనిపించనుండగా, మీనాక్షి చౌదరి దక్ష అనే ఆర్కియాలజిస్ట్ పాత్రలో నటిస్తోంది. ఈ చిత్రానికి అజనీశ్ లోక్‌నాథ్ సంగీతం అందిస్తున్నారు.