మాస్ మహారాజా సినిమాని లైట్ తీసుకున్న మైత్రి?

మాస్ మహారాజా రవితేజ వరుస పరాజయాల తర్వాత తన సినిమాల వ్యాపార విధానంలో మార్పులు చేస్తున్నట్లు తెలుస్తోంది. ప్రస్తుతం ఆయన నటిస్తున్న ‘ఇరుముడి’ చిత్రీకరణ పూర్తిచేసుకుని ఆగస్టు 21న ప్రేక్షకుల ముందుకు రానుంది. మైత్రీ మూవీ మేకర్స్ నిర్మిస్తున్న ఈ సినిమా కోసం రవితేజ తక్కువ పారితోషికం తీసుకుని, లాభాల్లో వాటా తీసుకునే విధానంలో పనిచేశారు. ఇదే నిర్మాణ సంస్థలో దర్శకుడు వివేక్ ఆత్రేయతో కలిసి ఓ స్టైలిష్ యాక్షన్ డ్రామా చేయడానికి కూడా ఆయన అంగీకరించారు. వచ్చే ఏడాది ప్రారంభంలో ఈ చిత్రాన్ని సెట్స్‌పైకి తీసుకెళ్లాలని భావించారు. అయితే ఈ ప్రాజెక్టుకు సంబంధించి తాజాగా కీలక మార్పు చోటుచేసుకున్నట్లు సమాచారం.

అనుకోని కారణాలతో మైత్రీ మూవీ మేకర్స్ ఈ సినిమా నుంచి తప్పుకున్నట్లు తెలుస్తోంది. దిల్ రాజుతో భాగస్వామ్యం నుంచి ఇటీవలే విడిపోయిన లక్ష్మణ్ ఈ చిత్రాన్ని నిర్మించేందుకు ముందుకు వచ్చినట్లు సమాచారం. దీనిపై త్వరలో అధికారిక ప్రకటన వెలువడే అవకాశం ఉంది. ఇదిలా ఉండగా, రవితేజ త్వరలో హసిత్ గోలి దర్శకత్వంలో దిల్ రాజు నిర్మించనున్న మరో సినిమాను ప్రారంభించనున్నారని తెలుస్తోంది. ఈ చిత్రాన్ని సంక్రాంతి 2027 నాటికి విడుదల చేయాలని చిత్రబృందం ప్రణాళికలు సిద్ధం చేస్తోంది.