‘పెద్ది’ స్పెషల్ సాంగ్ నుంచి తప్పుకున్న ఆ హీరోయిన్..?

రామ్ చరణ్ హీరోగా, జాన్వీ కపూర్ హీరోయిన్‌గా తెరకెక్కుతున్న పెద్ది సినిమా అనేక సమస్యలను ఎదుర్కొంటోంది. బుచ్చిబాబు సానా దర్శకత్వంలో రూపొందుతున్న ఈ క్రీడా నేపథ్య చిత్రం ఈ నెల 30న విడుదల కావాల్సి ఉండగా, షూటింగ్ పూర్తి కాకపోవడంతో జూన్‌కు వాయిదా పడింది. ప్రస్తుతం ఈ చిత్రంలోని ప్రత్యేక గీతం విషయంలో పెద్ద గందరగోళం నెలకొంది. ఆ గీతంలో ఎవరు నటిస్తారన్నది ఇంకా స్పష్టత లేకపోవడంతో అభిమానులు ఆసక్తిగా ఎదురు చూస్తున్నారు.

మొదట ఈ ప్రత్యేక గీతంలో తమన్నా భాటియా నటిస్తారని వార్తలు వచ్చాయి. ఆ తర్వాత మృణాల్ ఠాకూర్ పేరు వినిపించింది. అయితే ఆమె ఈ సినిమాలో లేనని స్వయంగా చెప్పడంతో ఆ వార్తలు ఆగిపోయాయి. తరువాత సంయుక్త మీనన్ ఈ గీతంలో నటించబోతున్నారని, ఆమె రామ్ చరణ్‌తో కలిసి చిత్రీకరణలో పాల్గొంటుందని ప్రచారం జరిగింది.

ఇప్పుడు తాజాగా సంయుక్త మీనన్ స్థానంలో శృతి హాసన్ పేరు వినిపిస్తోంది. గతంలో వీరిద్దరూ కలిసి నటించిన సంగతి తెలిసిందే. మాస్ గీతాలలో అనుభవం ఉన్న శృతి హాసన్ ఈ అవకాశం తీసుకునే అవకాశాలు ఉన్నాయని సినీ వర్గాలు చెబుతున్నాయి. అయితే దీనిపై ఇంకా అధికారిక సమాచారం రాలేదు. చివరకు ఈ గీతంలో ఎవరు కనిపిస్తారో తెలుసుకోవాలంటే మరికొన్ని రోజులు వేచి చూడాల్సిందే.