సినిమా షూటింగ్‌లో ఇమ్రాన్ హష్మీకి త్రుటిలో తప్పిన ప్రమాదం

బాలీవుడ్ నటుడు ఇమ్రాన్ హష్మీ నటిస్తున్న ‘గన్‌మాస్టర్ G9’ సినిమా షూటింగ్‌లో త్రుటిలో ప్రమాదం తప్పినట్లు సమాచారం. క్లైమాక్స్‌లో భాగంగా భారీ యాక్షన్ సన్నివేశాన్ని చిత్రీకరిస్తుండగా ఈ ఘటన చోటుచేసుకుంది. క్రేన్‌కు వేలాడదీసిన ఎస్‌యూవీ గాల్లో తిరుగుతున్న సమయంలో అదుపుతప్పి కింద పార్క్ చేసి ఉన్న వ్యాన్‌పై బలంగా పడింది. ఈ ఘటనకు సంబంధించిన వీడియో ప్రస్తుతం సోషల్ మీడియాలో వైరల్ అవుతోంది. అయితే, దీనిపై చిత్రబృందం నుంచి అధికారిక ప్రకటన వెలువడలేదు.

స్టంట్ ప్రారంభానికి ముందు చిత్రబృందం కౌంట్‌డౌన్ ఇచ్చినప్పటికీ, కారు గాల్లో తిరుగుతున్న సమయంలో అదుపుతప్పినట్లు తెలుస్తోంది. వ్యాన్ సమీపంలోనే ఇమ్రాన్ హష్మీ ఉన్నట్లు సమాచారం. దీంతో చిత్రబృందం అప్రమత్తమైంది. ఈ ఘటనలో ఎవరికీ గాయాలు కాలేదని సమాచారం. ఆదిత్య దత్ దర్శకత్వం వహిస్తున్న ‘గన్‌మాస్టర్ G9’లో ఇమ్రాన్ హష్మీతో పాటు జెనీలియా కూడా నటిస్తున్నారు. ఈ సినిమా నవంబర్ 27న ప్రపంచవ్యాప్తంగా విడుదల కానుంది.