‘ముఖ్యమంత్రి విజయ్‌’ను ‘స్టాలిన్‌’గా మార్చిన ఎక్స్‌

‘ముఖ్యమంత్రి విజయ్‌’ అనే వాక్య భాగాన్ని సామాజిక మాధ్యమం ఎక్స్‌ (X) ‘ముఖ్యమంత్రి స్టాలిన్‌’గా అనువదించడం చర్చనీయాంశంగా మారింది. గత శనివారం చెన్నైకి వచ్చిన లోక్‌సభ ప్రతిపక్ష నేత రాహుల్‌గాంధీ తమిళనాడు ముఖ్యమంత్రి విజయ్‌ను కలిసిన విషయం తెలిసిందే. ఈ సందర్భంగా రాహుల్‌గాంధీకి విజయ్‌ స్వాగతం పలికిన ఫొటోను ముఖ్యమంత్రి కార్యాలయం తన అధికారిక ఎక్స్‌ ఖాతాలో పోస్టు చేసింది. ఈ పోస్టులో రాహుల్‌గాంధీ, ముఖ్యమంత్రి విజయ్‌ భేటీ అయి మాట్లాడుకున్నట్లు పేర్కొన్నారు.

అయితే, ఆ పోస్టులోని ‘షో ట్రాన్స్‌లేషన్‌’ (Show Translation) ఎంపికను క్లిక్‌ చేసినప్పుడు ఆంగ్ల అనువాదంలో ముఖ్యమంత్రి విజయ్‌ పేరుకు బదులుగా తమిళనాడు మాజీ ముఖ్యమంత్రి ఎం.కె. స్టాలిన్‌ పేరు కనిపించింది. దీంతో ఎక్స్‌ అనువాదంలో చోటుచేసుకున్న ఈ పొరపాటు నెట్టింట వైరల్‌గా మారింది. రాజకీయ ప్రముఖుల పేర్లను అనువదించే క్రమంలో జరిగిన ఈ తప్పిదంపై ప్రస్తుతం చర్చ జరుగుతోంది.