

మానవుడు తయారు చేసిన అత్యంత దూర ప్రయాణ అంతరిక్ష నౌకగా రికార్డు సృష్టించిన NASA వాయేజర్-1 మరో చారిత్రక ఘనతను సాధించింది. 1977 సెప్టెంబర్ 5న ప్రయోగించిన ఈ వ్యోమనౌక.. 2026 నవంబర్ 18న భూమి నుంచి సుమారు 25.9 బిలియన్ కిలోమీటర్ల దూరాన్ని చేరుకుంది. అంటే ఒక కాంతి దినం దూరాన్ని అధిగమించింది. ఒక కాంతి దినం అంటే కాంతి 24 గంటల్లో ప్రయాణించే దూరం. మానవుడు తయారు చేసిన ఏ వస్తువూ ఇప్పటివరకు ఈ మైలురాయిని చేరుకోలేదు.
2012 ఆగస్టులో సూర్యుడి హీలియోస్ఫియర్ పరిధిని దాటి అంతర్నక్షత్ర అంతరిక్షంలోకి ప్రవేశించిన వాయేజర్-1.. ప్రస్తుతం గంటకు సుమారు 61,155 కిలోమీటర్ల వేగంతో ప్రయాణిస్తోంది. ఈ నౌకలో భూమిపై జీవం, సంస్కృతి, సంగీతం, వివిధ భాషల్లోని పలకరింపులకు సంబంధించిన వివరాలతో కూడిన గోల్డెన్ రికార్డు ఉంది. భవిష్యత్తులో ఏదైనా గ్రహాంతర నాగరికతకు ఈ నౌక ఎదురైతే.. భూమి గురించి తెలియజేయాలనే ఉద్దేశంతో ఈ రికార్డును రూపొందించారు. దాదాపు ఐదు దశాబ్దాలుగా కొనసాగుతున్న ఈ ప్రయాణం అంతరిక్ష పరిశోధనలో మానవుడి పట్టుదలకు, విజ్ఞాన తపనకు నిదర్శనంగా నిలుస్తోంది














కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!