

శబరిమల అయ్యప్ప స్వామి దర్శనానికి వచ్చే భక్తుల కోసం కేరళ ఆరోగ్య శాఖ కీలక ఆరోగ్య మార్గదర్శకాలను విడుదల చేసింది. కొండ ఎక్కే సమయంలో అధిక శ్రమకు గురికాకుండా, వైద్యుల సూచనలు పాటించాలని కోరింది. ముఖ్యంగా గుండె సంబంధిత సమస్యలు ఉన్నవారు యాత్ర ప్రారంభించే ముందు వైద్య పరీక్షలు చేయించుకుని, డాక్టర్ నుంచి ఫిట్నెస్ సర్టిఫికేట్ పొందాలని సూచించింది. ఇటీవల గుండెపోటుకు గురైనవారు, గుండె శస్త్రచికిత్స లేదా యాంజియోప్లాస్టీ చేయించుకున్నవారు నిపుణుల సలహా లేకుండా యాత్రకు రావద్దని స్పష్టం చేసింది. బీపీ, షుగర్ వంటి సమస్యలు ఉన్నవారు వాటిని అదుపులో ఉంచుకోవడంతో పాటు, క్రమం తప్పకుండా వాడే మందులు, వైద్యుల ప్రిస్క్రిప్షన్ను వెంట తీసుకెళ్లాలని తెలిపింది.
కొండ మెట్లు ఎక్కేటప్పుడు తమ శారీరక సామర్థ్యానికి అనుగుణంగా నెమ్మదిగా నడవాలని, మధ్యమధ్యలో విశ్రాంతి తీసుకుంటూ తగినంత నీరు తాగాలని సూచించింది. ఖాళీ కడుపుతో కొండ ఎక్కవద్దని, తోపులాటలు, పరుగులు చేయవద్దని హెచ్చరించింది. ఛాతిలో నొప్పి, ఊపిరి తీసుకోవడంలో ఇబ్బంది, అధిక చెమట, కళ్లు తిరగడం, గుండె కొట్టుకోవడంలో అసాధారణ మార్పులు లేదా తీవ్రమైన అలసట వంటి లక్షణాలు కనిపిస్తే వెంటనే నడక ఆపి వైద్య సహాయం పొందాలని తెలిపింది. నొప్పి చేతులు, దవడ లేదా వీపుకు వ్యాపించినా అప్రమత్తం కావాలని పేర్కొంది. అవసరమైతే సమీపంలోని అత్యవసర వైద్య కేంద్రాన్ని సంప్రదించాలని, అంబులెన్స్ సేవలను వినియోగించుకోవాలని కోరింది. అత్యవసర సహాయం కోసం 04735 203232 నంబర్కు కాల్ చేయవచ్చని తెలిపింది. నవంబర్ 17న ప్రారంభమైన మండల పూజ సీజన్ డిసెంబర్ 27 వరకు కొనసాగుతుంది. డిసెంబర్ 30న మకరవిలక్కు యాత్ర కోసం ఆలయం తిరిగి తెరుచుకోనుండగా, జనవరి 14న మకరవిలక్కు పండుగ నిర్వహిస్తారు. జనవరి 19 వరకు దర్శనాలు కొనసాగి, జనవరి 20న ఆలయం మూసివేస్తారు.














కామెంట్స్ (0)
ఇప్పటికి కామెంట్స్ లేవు
మొదటిగా కామెంట్ చేయండి!