వైఖరి మార్చుకోకపోతే భారీ పరిణామాలు.. ఇరాన్‌కు ట్రంప్ హెచ్చరిక

అమెరికా, ఇరాన్ మధ్య ఉద్రిక్తతలు కొనసాగుతున్న వేళ అమెరికా అధ్యక్షుడు డొనాల్డ్ ట్రంప్ మరోసారి తీవ్ర హెచ్చరికలు చేశారు. ఇరాన్ తన వైఖరిని మార్చుకుని అమెరికా కోరుతున్న షరతులకు అంగీకరించకపోతే భారీ పరిణామాలు ఎదుర్కోవాల్సి ఉంటుందని ఆయన పేర్కొన్నారు. ఫాక్స్ న్యూస్‌కు ఇచ్చిన ఇంటర్వ్యూలో ట్రంప్ ఈ వ్యాఖ్యలు చేశారు. మరోవైపు, అమెరికా నుంచి మరో దాడి జరిగితే గణనీయమైన ప్రతీకార చర్యలకు దిగుతామని ఇరాన్ హెచ్చరిస్తోంది.

ఇరాన్‌పై తదుపరి చర్యలకు సంబంధించి తాను ప్రస్తుతం కీలక నిర్ణయం తీసుకునే దశలో ఉన్నానని ట్రంప్ తెలిపారు. సైనిక చర్యను మరింత తీవ్రతరం చేయడం, ఇరాన్‌పై ఆర్థిక ఒత్తిడిని పెంచడం లేదా ఒక ఒప్పందానికి రావడం వంటి మార్గాలు తన ముందున్నాయని ఆయన పేర్కొన్నారు. సమీప భవిష్యత్తులో చాలా కీలక పరిణామాలు చోటుచేసుకోవచ్చని కూడా ట్రంప్ సంకేతాలు ఇచ్చారు. దీంతో ఇరాన్ విషయంలో అమెరికా తదుపరి అడుగుపై ఉత్కంఠ కొనసాగుతోంది.