ఓట్ల చోరీకి కుట్రలు పన్నేవారిని వదిలిపెట్టం: రాహుల్ గాంధీ

ఓట్లను కొల్లగొట్టేందుకు కుట్రలు పన్నుతున్న వారిని లక్ష్యంగా చేసుకుని ప్రజా అభిశంసన కార్యక్రమాన్ని చేపట్టామని కాంగ్రెస్‌ అగ్రనేత రాహుల్‌ గాంధీ అన్నారు. కేంద్ర ఎన్నికల ప్రధాన కమిషనర్‌ (సీఈసీ) జ్ఞానేశ్‌ కుమార్‌పై అభిశంసన తీర్మానానికి మద్దతు ప్రకటించారు. ఆయనపై కేసు నమోదు చేసి న్యాయస్థానంలో విచారణ జరపాలని డిమాండ్‌ చేశారు. విపక్ష నేతలంతా పచ్చిక బయళ్లలో కూర్చొని ఎన్నికల ప్రధాన అధికారి తొలగింపుపై చర్చించాల్సి రావడం విచిత్రంగా ఉందన్నారు. ప్రజాస్వామ్య వ్యవస్థల్లో తమకు అవకాశం కల్పించకపోవడంతోనే మరో మార్గం లేక మాక్‌ పార్లమెంట్‌ నిర్వహించాల్సి వచ్చిందని వ్యాఖ్యానించారు.

రాజ్యసభలో విపక్ష నేత మల్లికార్జున ఖర్గే నివాస ప్రాంగణంలో ఎంపీలు, సాధారణ పౌరులు సమావేశమై సీఈసీ తొలగింపుపై చర్చించడం దేశ చరిత్రలోనే అరుదైన పరిణామమని రాహుల్‌ పేర్కొన్నారు. ఇది కేవలం సమావేశం కాదని, రాజకీయ ఆయుధమని అభివర్ణించారు. జ్ఞానేశ్‌ కుమార్‌ తన పదవిలో కొనసాగేందుకు అర్హులు కారని, ఆయనపై తమ వద్ద తగిన ఆధారాలు ఉన్నాయని అన్నారు. మరోవైపు కేంద్ర ప్రభుత్వంపై విమర్శలు గుప్పిస్తూ.. ఎన్నికలను తారుమారు చేయడంతో పాటు సీబీఐ, ఈడీ వంటి దర్యాప్తు సంస్థలను దుర్వినియోగం చేసేందుకు ప్రయత్నాలు జరుగుతున్నాయని ఆరోపించారు. ఇవన్నీ తాత్కాలికమేనని, దేశ యువత ప్రభుత్వాన్ని క్షమించదని వ్యాఖ్యానించారు.